Online Reporter
Peter Matika
UPROSPER Vanhuvaone owayesehluphile ngokuzenza udokotela esibhedlela seMpilo ugwetshelwe ukuyapika inyanga ezingu-84 ejele.
UProsper kukhangelelwe ukuba apike inyanga ezingu-42 nxa engenelisa ukubhadala imali zalabo ababegula abaqilayo kungakafiki umhlaka 30 Ntulikazi.
UProsper wayeqila abantu ezenza angathi ngudokotela, ethatha imali kulabo ababedinga usizo lokwelatshwa bebona angathi belatshwa ngudokotela oqotho, obanika lemithi eyiyo eqondileyo.
Njengoba abadala besithi akuqili lazikhotha emhlane, lamtshonela emini ilanga, uProsper nanko wabanjwa ngemva kokuba inkokheli zesibhedlela lesi seziqale ukusola ukuba ulesicoco siphi ngoba besola indlela asebenza ngayo okuyikho okwabangela ukuthi kwenziwe inhlolisiso eyacina isenza abotshwe.
Inkundla iveze ukuthi isenzo sikaProsper besibeka engozini impilo zabantu futhi sibuye sangcolisa ugatsha lwezempilakahle.
