admin
YiNtatheli kaMthunywa
SELINGUMHAMBUMA elinye inina lesigabeni seZezani eBeitbridge kulandela ukubhaxabula umkalo limtshiye esititshini sokufa kubangwa ukulala engekho endlini.
USinikiwe Mleya usesidla lamanqe kulandela ukubhaxabula umkakhe uTrial Mleya ngensimbi ngoba elele engekho endlini ngoMgqibelo.
Kubikwa umkakhe wathi engena nje endlini, uSinikiwe kazange aphozise amaseko kodwa wahle wadobha insimbi wamgongoda ikhanda kanengi nengi okwabangela ukuthi athi daca phansi.
Omunye umakhelwane okhulume lentatheli uNkosazana Marylin Moyo uthe uSinikiwe watshaya indoda wayitshiya iphakathi kwechibi legazi.
“USinikiwe wenza esingakaze sikubone, lakhathesi uTrial usesimeni esibi esibhedlela kulandela ukutshaywa ngensimbi ikhanda.
“Kukhanya uSinikiwe waxabana lomkakhe ngoba elele engekho esuke esithi uya embukisweni.
“Asazi ukuthi wangenwa yini sibili ngoba kukhanya wadobha insimbi watshaya ngayo umkakhe wamtshiya elele phakathi kwechibi legazi,” kulandisa uNkszn Moyo.
Kubikwa uSibongile wathi ebona ukuthi umkakhe usethe daca phansi watshaya utshani.
Omunye umakhelwane uSibongile Mleya uthe uSinikiwe waxabana lomkakhe ngoba elele engekho endlini.
“Lokhe isehlakalo lesi senzakalayo uSibongile kaziwa ukuthi wangena kuwuphi umlindi.
“Abantu sebezamile ukumdinga kodwa lokhu engabonakali,” kulandisa uNkszn Mleya.
“Isikhulumi samapholisa esabelweni seMatabeleland South uInspector Loveness Mangena ebuzwa ngodaba lolu uvumile wathi solufikile ehofisini yabo njalo abathatheneyo kumele balungisise ingxabano kuhle.
“Abathetheneyo nxa besuke kwaba lokumgazwani kabalungisise indaba zabo ngesihle njalo kababikele abaphathi bezigaba loba amapholisa ngoba udlame aluvunyelwa,” kuphetha uInsp Mangena.
Online Reporter