Online Reporter
Fungai Muderere
WAKE waba sematheni engowesifazane wokuqala ukuqeqetsha kuligi yabesilisa kuleli. Khathesi, usengene kubanga laphezulu kwezokuqeqetsha e-Africa.
Ngemva kokuthola isithupha senhlanganiso yeConfederation of African Football (Caf) Women Instructors Development Programme, uSithethelelwe “Kwinji 15” Sibanda usenconywe waphiwa inhlonipho enkulu yinhlanganiso le, ephethe ibhola kuzwekazi le-Africa.
I-Caf isikhuthaze ngokusemthethweni inhlanganiso yeZimbabwe Football Association (Zifa) ukuthi isebenze loSibanda kunhlelo ezizayo zemfundo yebhola lenyawo, ibabaza amandla akhe okuthuthukisa izinga labaqeqetshi.
USibanda, odume ngelithi “Kwinji 15” wadlalela amaMighty Warriors leNew Orleans, njalo nguye umqeqetshi weqembu lelizwe labesifazane.
Kuncwadi elotshelwe iZifa mhlaka 28 Nkwenkwezi, umqondisi wezentuthuko kunhlanganiso yeCaf, uRaul Chipenda uthe:
“Siyajabula ukuqinisekisa ukuthi uSithethelelwe Sibanda uphatheke kuzifundo ngokugcweleyo. Ngokukhangela ukusebenza kwakhe lokuhlola okwenziwe zingcitshi zeCaf, u-Instructor Sibanda utshengise ukuzimisela lokulungela ukufundisa kuzifundo zokuqeqetsha kuCaf kuze kufike ezingeni leCaf B Licence kanye lokusiza ekuqhutshweni kwezifundo zeCaf A Licence.”
Uthe iCaf izimisele ekuthini iphakamise abesifazane kumabanga okuqeqetsha lokukhokhela umdlalo.
“ICaf isazimisele kakhulu ekuthuthukiseni abesifazane ebholeni. Lolu uhlelo lutshengisa imizamo yethu yokuphakamisa abesifazane abakhokhelayo. Ngenxa yokuqeda kwakhe izifundo ngempumelelo lokuhlaziya okuncomekayo, sikhuthaza inhlanganiso yeZimbabwe Football Association (Zifa) ukuthi iphathe uSithethelelwe Sibanda kunhlelo zeCaf ezizayo.”
Ngo2015, waba ngowesifazane wakuqala ukuqeqetsha kubanga lePSL engumsekeli kaLizwe Sweswe kuTsholotsho FC.
Wasuka lapho wakhethwa njengomsekeli kamqeqetshi wamaMighty Warriors, uShadreck Mlauzi, ngesikhathi iZimbabwe incintisa kumidlalo ye-2016 Rio Olympics.
