admin
YiNtatheli kaMthunywa
UGIFT Lunga uzayimela njalo ithimu yenguqu yesikolo seMzilikazi High kumncintiswano omkhulu wesikolo kuleli, iCopa Coca-Cola.
ULunga ngomnyaka ophelileyo wathola ithuba lokuthi ayedlalela iZimbabwe ezweni leKenya ngemva kokutshibilika okwajabulisa abacuphi bomdlalo. Kuyo yonke imidlalo yakhe, umdlali lo usetshiye ababukeli bengelankani ngokutshibilika akwenzileyo.
ULunga lo ngumntakaGift Lunga Jnr owayedlalela iHighlanders, ongumqeqetshi wabasakhulayo kuqembu elifanayo.
Umfana lo odlala engumgadli othenjiweyo eMzilikazi High uzakubayinsika njengoba isikolo lesi sizancintisela ukumela isabelo sakoBulawayo kuma-final azaqhutshwa ngoNtulikazi.
Umdlali lo, othanda ukuba sesiswini senkundla kweminye imidlalo, wahlukile kuloyise owaduma njengemvimbi evala kubi.
Kumncintiswano weCopa Coca-Cola ngo2014, uLunga wancedisa iMzilikazi High yafinyelela ihlandla lama-semi final kalula, kodwa yehlulwa yiChemhanza High yaseMashonaland East.
ULunga nguye yedwa phakathi kwabafana beMzilikazi owangena kuDream Team eyavakatshela eKenya.
Ukhulume loMthunywa wathi: “Ubaba kangedluli ngebhola. Kuyangithabisa ukuthi sengike ngamela iZimbabwe kumncintiswano weCopa Coca-Cola. Ngizaphinda futhi lonyaka. Ngiyazi ukuthi abanengi sebefanisa umdlalo wami lokababa, kodwa sitshiyene kakhulu. Mina ngizakuya khatshana.”
Nxa engenelisa ukudlala njengalokho akwenza kuminyaka emibili edluleyo, akhethwe kuDream Team, uLunga uzancintisa lamazwe abalisa iKenya, Uganda, Tanzania, Ethopia, Angola, Mozambique, Zambia, Botswana, Namibia, Rwanda, Congo, Swaziland, Nigeria, Lesotho, Madagascar, Mauritius leBurundi.
Ukudlala kwalumfana kwanconywa ngabaqeqetshi abahloniphekayo kuleli uTaurai Mangwiro loNorman Mapeza.
“Angesabi ukuthi ngimbize kuqembu lami ngoba ulekusasa enhle engumdlali wenguqu,” kutsho uMapeza.
UMapeza, oqeqetsha iqembu leFC Platinum uthe umdlali weMzilikazi lo kumele azibambe ukuze afike khatshana ngomdlalo.
“Ithalenta elinjengelikaLunga kumele liphakanyiswe. Umdlali laye akhuthalele inguqu, azibambe. Ikusasa yabafana abadlale kuhle besesesikolo ivulekile. Kuminyaka elandelayo ngibona angathi isizwe sizajabula ngalumfana.”
Kulumnyaka umncintiswano weCopa Coca-Cola kuleli kukhangelelwe ukuthi udlalelwe ngabadlali abafika-11 500 kuhlandla labafana lamankazana.
Ababukela imidlalo yonke kusukela kumncintiswano yama-zone kusiya ku-final, kubikwa bengaba yi-3,5 miliyoni.
Lonyaka imidlalo yomncintiswano lo izaqhutshwa koBulawayo, esikolo seGifford lapho okuzadlala amathimu abafana. Amantombazana azadlala eChidyamakono esiqintini seChivi eMasvingo.
Online Reporter