admin
YiNthatheli kaMthunya
USANDRA Ndebele-Sibindi usephindile njalo ukuphekela umphakathi ukudla kwamehlo nanko phela lamuhla ukhangelele ukuphakululela abalandeli bakhe idlalade lakhe lesikhombisa alicindezela esebenza loJah Prayzah.
USandy, okulibizo lakhe lokukokotsha esitikini ukhangelele ukungenisa idlalade lakhe elithi Izenzo lamuhla enkundleni ye-Large City Hall.
Idlalade leli lilengoma ezilitshumi ezigoqela ethi Bulawayo, Madlira, Uma ehamba, Gare muKaranga phakathi kwezinye.
Kulengoma ethi-Love yemushona leNdebele ayipheka esebenza loJah Prayzah omunye umhlabeleli odumileyo elizweni kukanti ezinye wazipheka labahlabeleli abafana loJeyz Marabini, Thandeka Dlana kanye leqembu lamaTeddy Bears eleGoli njalo eligida loDJ Cleo.
USandy uthe leli idlalade licitshe lifane lomdumo we-house ngoba liphekwe ngohlonzi lwakhona.
“Ngomnyaka ophelileyo angenelisanga ukuhwatsha idlalade ngoba ngangibambekile ngokunye kodwa ngahle nganquma ukuthi kuwonalo umnyaka kumele ngikwenze lokhu.
“Ngeviki edluleyo ngenelise ukucindezela idlalade lami lesikhombisa njalo ngisebenze labadlali abambalwa ngenhloso yokuthi lami ngithole ulwazi oluthile kubo.
“Ingoma zami zihlanganise indimi ezifana lesilungu kanye lesiShona ngoba udumo lwami alupheleli emhlubulweni weMatabeleland kuphela kodwa lusabalele elizweni lonke nje jikelele,”kutsho uSandy.
UNdebele-Sibindi ngomunye wabahlabeleli bakoBulawayo asebelodumo olumangalisayo elizweni kukanti futhi ungumeli wogatsha lwe-traffic safety olubona ngokutshayela kakuhle izimota emigwaqweni ukuze kuvikelwe izihambi.
Online Reporter