Siphakeme .Mnindwa
Brandon Moyo
UMDLALI wekhilikithi wakuleli odlalela iqembu leDurbar Rajshahi, uRyan Burl uzahlekela esikhewini kumalanga alandelayo nanko phela kubikwa abadlali beqembu leli sebezathola iholo labo.
Lokhu kubikwa lugatsha lwezemidlalo kuhulumende weBangladesh, oluthe umnikazi we Durbar Rajshahi uShafiqur Rahman usezimisele ukuthi abhadale abadlali imali yabo kusiyafika umhlaka 10 Nhlolanja.
URahman ekuqaleni wayethe uzanika uBurl labanye abadlali imali yabo ngeSonto edluleyo, kodwa wehluleka.
Kubikwa uhulumende weBangladesh wabumba ikhomithi ezahlola udaba.
“URahman uyavuma iphutha lakhe njalo uthembisa ukuthi uzabhadala abadlali ngeziqephu ezintathu zesilinganiso se-25 phesenti mhlaka 3, 7 lo-10Nhlolanja. Kungehlula, uzahanjiswa kungatsha zomthetho,” kutsho umbiko ovele kuhulumende weBangladesh.
Iqembu le Rajshahi lakhitshwa kuBangladesh Premier League (BPL) ngoMgqibelo.
Ngesikhathi iqembu leli lisehluleka ukubhadala, abadlali abaphuma kwamanye amazwe bathwala nzima sebexotshwa ehoteleni edolobheni leDhaka ngeSonto. Abadlali laba nguBurl, Mohammad Haris (Pakistan), Aftab Alam (Afghanistan), Mark Deyal loMiguel Cummins abeWest Indies.
Online Reporter