Online Reporter
Yintatheli kaMthunywa
UNOGADA weMatopo wokutshontsha umbhobho wadubula inina wabuye wadlwengula elinye kubikwa usezibulele eMasvingo.
ULlody Mutsengi oleminyaka engu-50 yokuzalwa uzidubule ngoLwesine.
ULlody wantshontsha umbhobho emsebenzini lapho aqhatshwe khona emgodini wahamba lawo wayahlangana labomama ababili wafika wadubula uSamantha Gama andubana adlwengule omunye qede wabaleka eqonda eHow mine.
UGama wathwalelwa esibhedlela lapho abafika bathi usedlule emhlabeni.
Kuzwakale ukuthi uMutsengi wathatha umbhobho wawufaka esikhwameni wagada waya koGutu, eMasvingo lapho ahlangana khona lomntanakhe ezitolo wamtshela ukuthi amapholisa ayamdinga njalo amdingela icala lokubulala lelokudlwengulwa ngokwethuka wathi umntanakhe amlinde ezitolo wangena indlela wahamba uthe eseseduze leganga wazidubula.
Izakhamizi zezwa umbhobho ukhala zahamba zayakhona zathola ezidubule zabikela amapholisa.
Intatheli ixhumane lesikhulumi samapholisa uAssistant Inspector Nomalanga Msebele ubike ukuba abantu kumele bahloniphe impilo.
“Sikhuthaza uzulu ukuba ahloniphe impilo yomuntu. Abantu abekele umkhuba wobudlwangudlwangu,” kutsho uAsst Insp Msebele.
