Online Reporter
Lovemore Dube
UMSEKELI kamgcinisihlalo weHighlanders, uFiso Siziba, uthethe isikhathi wavakatshela isikolo afunda kuso, iSobukhazi High School, lapho ethule khona inkuthazo kumaqembu kanobhutshuzwayo lebhola lokuqaga.
Iqembu labafana abangaphansi kweminyaka engu-16 yokuzalwa kulesi isikolo lithole isicoco sokuba zintshantshu zesabelo sakoBulawayo ngemva kokunqoba amaqembu ayemele izigaba ezehlukeneyo ngeviki edluleyo, okulenze lathola itikiti lokuyamela isabelo emidlalweni yezabelo, ezadlalelwa eMasvingo.
Zonke izabelo ezilitshumi zizangena kulumncintiswano, kuthi isabelo esizabe siphethe imidlalo sifake amaqembu amabili labavikeli besicoco banyakenye.
Iqembu lamantombazana elokuqaga elabadlali abaleminyaka yokuzalwa engaphansi kweminyaka engu-20 lalo seliphumelele ukuya emidlalweni yokucina ezabe iseMarondera, esabelweni seMashonaland East.
Imidlalo yebhola likanobhutshuzwayo iqale ngoLwesithathu iphele ngoLwesihlanu, njalo kulindelwe ukuthi amaqembu adlala esigabeni esiphezulu athumele abahloli bethalenta ukuyadinga abadlali abatsha abathembisayo.
Iqembu le-netball lona lizakuya eMarondera ngoLwesibili oluzayo.
Ekhuluma labafundi lababalisi uSiziba uthe uyathokoza ukubuyela esikolo esamkhulisayo.
“Ngiyathaba ngokuba lapha njalo ngithanda ukubonga umphathisikolo kanye lababalisi ngokusinxusa ukuthi sibe lapha esikolo esasilolayo,” kutsho uSiziba, ophinda abe ngomunye wezikhulu zeziphathamandla zamapholisa koBulawayo.
“Lesi isikolo sasinika ukuzethemba ngokusebenzisa ezemidlalo. Sasiyindawo yokuveza abadlali abafana lo-Augustine Lunga, kwalandela isizukulwane sikaMgcini Silongwe loDumisani Ngulube, kwasekubuya thina esasiloNkululeko Dlodlo, Makwinji Soma-Phiri, Gift Lunga omdala, Nkosilathi Maseko loFarai Sibanda ongumphathi weBulawayo Chiefs khathesi.” Uqhubeke wafisela abafundi inhlanhla emidlalweni yokucina, ebika ukuba ulethemba lokuthi iSobukhazi High izaqhubeka iphakamisa ibizo layo ezingeni eliphezulu kwezemidlalo yezikolo kuleli.
ISobukhazi High isilolonge inengi leziphathamandla kwezemidlalo ezehlukeneyo. Phakathi kwazo kulomdlali webhola likanobhutshuzwayo uGodfrey Paradza labadlali be-volleyball uSikhumbuzo Gwala loXoli Lubimbi.
Isikolo lesi, esikhokhelwa yindikimba ethi: “Umntwana Kuqala”, sisebenzisa indlela ehlanganisela wonke umfundi. Lokhu kubonakala ngokuthi kulabafana abathathu abakhubazekileyo kuqembu lebhola lesikolo.
U-Eunice Magagula, ongomunye wababalisi abasebenza labafundi abaphila lokukhubazeka okutshiyeneyo, uthe isikolo sizimisele ukusiza wonke umfundi ukuthi athole ithuba lakhe.
“Umphathisikolo, ababalisi lamalunga wonke esikolo bayasikhuthaza ukuthi sifundise wonke umntwana into angayenza engamphathisa kwelakusasa.
“Silabafana abathathu abalobunzima obuthile kodwa asebetshengise ithalenta elikhulu ebholeni,” kutsho uMagagula.
Umphathisikolo, uCain Ncube, uthe uyathokoza ngengqubekela phambili yesikolo, kungakhathalekile kwezemfundo loba kwezemidlalo leminye imisebenzi yangaphandle kwekilasi.
Uthe impumelelo yamaqembu la iyisibonelo sokuzimisela kwabafundi, ababalisi lokusekelwa ngabazali ekuthuthukiseni ikusasa labantwana.
