Online Reporter
Nkosilathi Sibanda
INDODA yeGuruve ebisihluphile, uAnymore Zvitsva imiswe phambi kukamantshi weHarare isetheswa amacala alitshumi lambili; ayisificaminwe mibili okubulala, amabili okudlwengula lamanye amabili okuzama ukubulala.
UZvitsa, oleminyaka yokuzalwa engu-33, odabuka eVheremu village, ngaphansi kwenduna uChipiriro, ubesethwalise nzima izakhamizi zendaweni le.
Umsolwa ubephethe ebalekela amapholisa kusukela ngomnyaka ka-2024. Uze wabotshwa ngemva kokuba amapholisa enze umkhankaso wokumzingela.
Ubotshwe mhlaka 3 Zibandlela lonyaka ngemva kokwenza amacala la phakathi kukaMabasa 2024 kusiya kuMpalakazi 2025 eGuruve, Nyakapupu, Mvurwi, eMazura Farm lakundawo eziseduzane.
Kubikwa ubegqekeza ezindlini, esebenzisa izikhali ezibalisela ingqamu, imikhonto, insimbi, amabhemba, abuye athiye ngocingo, afake itshefu. Ubehamba ebulala, adlwengule, qede lapho angcwabe labo ababuleleyo.
Ngokubika kweNational Prosecuting Authority of Zimbabwe, uZvitsa ubesenza lokhu phambili kwabantwana njalo wake wathumba umuntu wamusa entabeni.
INational Prosecuting Authority of Zimbabwe ibike njalo ukuba umsolwa, kumacala okubulala, wakhama, wagwaza esinye isisebenzi esitolo ngesikhathi egqekeza.
Umsolwa ukhuthazwa ukuba acele ibheyili eHigh Court. Uzaphenduka emthethwandaba mhlaka 19 Zibandlela 2026.
