shloboe boe
YiNtatheli kaMthunywa
NGEMVA kweminyaka eyisitshiyagalombili, umqeqetshi wabonozinti uTembo “Chokri” Chuma usephendukile kuqembu leHighlanders.
Ungene emsebenzini ngoLwesithathu. Isikhundla lesi sivele kulandela ukutshiya umsebenzi kukaDaniel Khumalo nyakenye.
IBosso kumalanga adluleyo, ihlole abaqeqetshi abathathu uTembo, Peter “Oxo” Nkomo loMunyaradzi Diya. Umfakazi oqotho osemahofisini eqembu uthe bobathathu laba bahlolwa ngoLwesihlanu ngeviki edluleyo njalo iqembu liyajabula ngezinga labaqeqetshi laba abakade befuna lumsebenzi.
UChuma uhambe phambili kulabo bonke njalo akumangalisi ukuthi inkokheli zeqembu zikhethe yena. Waziwa engumqeqetshi ololwazi lokulolonga onozinti ukwedlula abaqeqetshi abanengi kuleli nanko usesebenze kumaqembu aphezulu njalo sewakhulisa onozinti asebethethe isicoco seGoalkeeper of the Year u-Ariel Sibanda (Highlanders) ngo-2012, Munyaradzi Diya (Highlanders, 2013), Tendai Hove (ZPC Kariba 2014) Ariel Sibanda (Highlanders 2018) loWallace Magalane (FC Platinum 2022).
UNkomo, ubekade elunguzile, ethembe ukuthi uzaphenduka kuTshilamoya, uhlonitshwa njengomqeqetshi owalolonga onozinti abagoqela uNjabulo Nyoni, Ariel Sibanda, Tapiwa Kapini, Washington Arubi, Tafadzwa Dube, George Chigova lo-Energy Murambadoro.
UDiya wake wabangunozinti weHighlanders.
Online Reporter