admin
Fairness Moyana
KULOMFUNDISI weHwange otshaywe ngumkakhe wabuya wambhabhathiza ngenkomitsho yotshwala ngemva kokuba emthole enatha utshwala labangane bakhe wasebuchitha.
Umamangala uSaul Mano (54) osebenza enkampanini yeHwange Colliery kubikwa wenza isivumelwano lomkakhe uDorothy ukuthi anathele utshwala endlini kulokuthi ayenatha emabhawa ngoba esehlulekile ukumekelisa utshwala.
Kubikwa ngelanga elingasaqanjwanga ngenyanga kaNhlolanja umsolwa evela emsebenzini wathola indlu yakhe siphenduke yaba yibhawa umkakhe ezinathela labangane bakhe bengagqize qhakala.
Esinye isakhamuzi sakule indawo sibikele uMthunywa ukuthi umamangala wacatshulwa yikungamhloniphi komkakhe yikho wachithela utshwala lobo phansi ethi umkakhe sephendule indlu yakhe yaba yibhawa.
“Umamangala wafika evela emsebenzini ngehola lesithupha wathola umkakhe ezinathela utshwala labangane bakhe, wamthethisa ethi kungani esenza indlu yakhe ibhawa kanye lendawo yokuhlanganela onondindwa.
“Wasethatha utshwala obabulapho wabuchithela phansi okwenza umsolwa wasukuma waqala ukuxabana laye,” kuchaza lesisakhamuzi.
Kubikwa ngemva kwalokho umsolwa wazonda wathatha utshwala ayebunatha wathela ngabo umkakhe ebusweni wabuya wamtshaya ngenkomitsho. Ngemva kwalokho umsolwa wagijima wayangena emkulwini wathatha ingqamu wasezivalela endlini esenzela ukuthi umkakhe engangeni.
Umfundisi lo kubikwa wasuka lapho wayabikela amapholisa loludaba okwadala ukuthi umkakhe abotshwe. Ngemva kwalokho amapholisa amkhulula athi akulabufakazi obuqotho ngalelicala eletheswa umsolwa.
UMano kubikwa wasuka njalo wayavuselela lelocala ethi ufuna ukuba umkakhe ambhadale ngokumtshaya kwakhe ngoba selabafakazi abaqotho ababili. Ngakho lelicala lavuselelwa lilindelwe ukuthoniswa.
Imizamo yokukhulumisana lomamangala kanye lomsolwa yehlule ngoba incingo zabo zalile ukungena.
Online Reporter