CHRONICLE

Utholakala lamafoni 33 lezijumba zezidakamizwa

Danisa Masuku

KUBOTSHWE indoda eleminyaka engu-26 yokuzalwa ehlala elokitshini lePumula South koBulawayo ngemva kokuba amapholisa eyikhande ilezidakamizwa ezingavunyelwayo lamafoni angu-33 endlini yayo.

Indoda le, uGracious Mpofu, ibotshwe mhlaka 16 Lwezi 2026, ngehola lesitshiya galolunye ekuseni, kulandela ukuthi amapholisa enze uphenyo lokulandela udaba lokutshontshwa kwabomakhalekhukhwini.

Amapholisa athe uMpofu waphiwa ifoni eyayitshontshiwe ukuze ayitshintshe ngesidakamizwa. Ekufikeni kwawo endlini yakhe, amapholisa aqoqoda efasiteleni, uMpofu waphendula kodwa wala ukuvula umnyango.

Ngemva kwesikhathi, amapholisa ebulala isivalo, uMpofu wasevula umnyango wesibili.
Isikhulumi samapholisa koBulawayo u-Inspector Nomalanga Msebele uqinisekise ngokubotshwa kukaMpofu.

“Sibophe indoda eleminyaka engu-26 yokuzalwa ehlala ePumula South ngemva kokuba itholakale ilezidakamizwa ezingavunyelwayo lempahla esicabangela ukuthi itshontshiwe,” kutsho u-Insp Msebele.

“Endlini kwatholakala umakhalekhukhwini weSamsung A eyayitshontshiwe. UMpofu wavuma ukuthi wayitshintsha ngembanje.”

Kubikwa uphenyo lwaqhubeka endlini kwatholakala amafoni angu-33, ama-power bank angu-10, izikali ezimbili zokulinganisa izidakamizwa, ingqamu ye-okapi eyodwa, amapakethe amancane awe-crystal meth angu-53, amaphakethe amakhulu amabili e-crystal meth, amaphakethe embanje angu-113 lamanye amakhulu amathathu.

Izidakamizwa lezi zalinganiswa eBelmont Post Office laye uMpofu ekhona, kwatholakala ukuthi i-crystal meth yayilesisindo eyi-0,114 gram, imbanje zona zilesisindo se-1,466 kilogram.

Konke okwatholakalayo kulinganiselwa ku-US$3 800.

UMpofu uhanjiswe enkambeni ye-ZRP Donnington, lapho avalelwe khona.

uGracious Mpofu

U-Insp Msebele uthe amapholisa athatha amanyathelo ngemva kokuthola ulwazi olwaluhlanganisa umsolwa lodaba lokutshontshwa kwefoni.
“Sinxusa uzulu ukuthi aqhubeke encweba amapholisa indlebe ukuze kubotshwe abantu abaphatheka ekuthengiseni izidakamizwa lokutshontsha,” kutsho u-Insp Msebele.