admin
IZAKHAMIZI zithi uPapa Mahlake (27) wayevuka phakathi kwamabili aqale imithanithani yakhe kasathani ekhuleka ngendlela engajwayelekanga ngolimi abantu abangaluzwisisiyo.
Abanye ababeyakhelane laye emikhukhwini yeAngelo, eBoksburg, eKurhuleni, kweleSouth Africa bathi wayegqoka impahla ezimnyama tshu, alumathise amakhandlela amanengi endlini yakhe abeseqala ke ukwenza imithanithani yakhe le abakholelwa ukuthi ngekasathane.
Kubikwa njalo kulabanye abantu abambona efaka ukhakhayi lamalahle eceleni kwamakhandlela akhe. Kodwa yinye nje into eliqiniso, imithanithani yakhe iphethe ngokufa kwakhe.
Izakhamizi zithi mhla esifa uPapa bezwa umuntu eklabalala bathi bethi mehlo suka babona umkhukhu wakhe usungamalangabi ayesabekayo.
Umlimo kubikwa wamemetheka walumathisa eminye njalo imikhukhu. Abantu bagijima bezama ukucitsha umlilo kodwa abazange bakwenelise lokho ngoba ilangabi lakhona lalisesabeka njalo lilolaka kungakho-ke umkhukhu kaPapa leminye emithathu yatshabalala.
Ezinye izakhamzi zenelisa ukubaleka kodwa uPapa kubikwa wahle watshabalalela phakathi komkhukhu wakhe.
Intatheli zikhulume loMnumzana Stephen Mathebula (40), ngempelaviki wathi wayesemzini womngane wakhe ngesikhathi kusenzakala linkemenkeme.
“Umkhukhu wami ngomunye owatshabalalayo ngesikhathi kusiba lomlilo lo owabulala uPapa. Salahlekelwa yimpahla yonke kulowo mlilo,” kutsho uMnu Mathebula.
Uthe wayeke walimukisa uPapa ngendaba yakhe yokukhuleka elumathise amakhandlela amanengikazi.
“Wayekhuleka ebanga umsindo omkhulu phakathi kobusuku elumathise amakhandlela. Ngangihlala ngisesabela ukuthi uzasitshisela endlini ngoba wayethi nxa ekhuleka uzwe kusiwa izinto emkhukhwini wakhe wayezwakala njalo ehlaba umkhosi aphinde enze njengomuntu okhanywayo,” nguMathebula lo.
“Abangakibo bathe bazabuya ukuzokwenza okwamasiko ukuze bathathe umoya kaPapa usuke emphakathini ngoba abantu bayesaba ukuthi mhlawumbe angapoka ngoba ufe ngendlela ebuhlungu kakhulu.
Abatshelwa yimikhukhu kungozi le bathe sebakhe kutsha kodwa abalakho okokuqala ukuthenga impahla yabo eyatshabalalayo kuthi abanye labo bathi okwabangela umlilo yimisebenzi kasathane ngoba kuvele kuyinto eyayicatshangelwa ukuthi uPapa wayesebenzela usathane.
“UPapa wayengajwayeleki lezinto ayezenza zazisenza simesabe nanko phela wayehlala egqoke impahla ezimnyama.
Wayezwakala engumuntu olezindubo ezinengi njalo ongelakuthula emoyeni wakhe kodwa siyethemba lapho akhona lamuhla usekutholile ukuthula ayekudinga, kutsho esinye isakhamuzi esale ukuqanjwa ngebizo.
Amapholisa labacitsha umlilo basadinga ukuthi kungabe kuyini eyabangela umlilo owabulala uPapa. —Ubulembu
Online Reporter