admin
Buhlebenkosi Gaule
KULONTOMBAZANA weTsholotsho othe esebanjwe ukuthi ukhiphe isisu wazivikela ngokuthi kasikhiphanga, ubulele igundwane hatshi inkonyane.
Lokhu kuzwakale emthethwandaba kamantshi weTsholotsho kuliviki lapho uSinesisa Khumalo oleminyaka yokuzalwa engu-20 amiswe khona phambili kwenkundla ephika icala lokukhipha isisu.
Kuzwakale ukuba uKhumalo wajikela inkoyane esambuzi sangakwabo. Kubikwa mhlaka 25 kuMabasa kuwonalo umnyaka uKhumalo, owayezithwele umthwalo olenyanga eziyisithupha wakhipha isisu.
UKhumalo kubikwa uthe eqeda isiga lesi, wajikela inkonyane esambuzi sakwabozala lapha ebehlala khona. Inkundla izwe ukuba uKhumalo wabanjwa esenza lokhu ngesinye isihlobo somkakhe uMboneli Dube owabikela izihlobo.
Kubikwa uMnu Dube wabona amathonsi egazi ayesexhibeni likaKhumalo ngokunjalo wabuza ukuba kwakuligazi lani.
UKhumalo wanika impendulo yokuba kwakuligazi lamagundwane ayefele endlini yakhe.
Inkundla itshelwe ukuthi uMnu Dube kwabanzima kuye ukuba akholwe lokhu ayekutshelwa, wasuka lapho wabikelala uninazala kaKhumalo uNkosazana Thabani Dube.
UNkszn Dube wabuza uKhumalo ngodaba lwegazi waqala waqamba amanga njalo esithi ligazi lamagundwane.
Ngemva kokuzwa loludaba kubikwa uNkszn Dube wathi akukhitshwe inkonyane esambuzini.
Ekhuluma phambili kwenkundla ngesenzo sakhe, uKhumalo uthe isizatho sokuthi akhiphe isisu yikuthi umntanakhe wokuqala ulomnyaka owodwa, ngakho ubengasoze enelise ukubondla bonke ngesikhathi esisodwa.
Ukuthethwa kwecala kuyaqhubeka mhlaka 20 kuNkwenkwezi.
Online Reporter