admin
Silo Mehleli Dube
Umuntu wonke ephuma ebujaheni kumbe ebuntombini ukhangelele ukuthi asebenze abelomuzi wakhe labantwana, abelempahla ebiza yena phela kuyasentshezelwa ukuthi umuntu aze abe lalokhu lalokhuya.
Isimanga lezinsuku uthola kulabantu abathi benza umuntu anothe engajulukanga izithukuthuku, le yinotho eyingozi njalo ezakwenza uzisole kusasa izinto zingasakuhambeli kuhle.
Uyake uzwe emisakazweni lakumaphephandaba bekhankasa bethi bona nxa ufuna ukunotha buya kubo bakunike impande zakhona, into esuke imangalise yikuthi lowomuntu othi uzakwenza unothe yena uyabe etshaya inja ngekhanda udinge uswele ukuthi kambe angenza omunye umuntu anothe njani empilweni phela akulamuntu ongafuni ukukhomba ngophakathi, laye athi nxa ekhwaza kuthithibale wonke oseduze.
Uyathola isikhathi esinengi abantu beqilwa ngabaphurofethi bamanga lezinyanga lezi ezibizwa kuthiwe zinyanga mthakathi.
Uzwabethi nxa ufuna ukuba lomgodi wegolide buya sikuphe okuzimpanjana, abantu labo ngobuthutha badlele njengenhlanzi ebanjwa ngewuka efakwe iwemusi.
Abanye bayayengwa kuthiwe bulala isihlobo sakho usicuyacuye ubuye lezitho ezithile zomzimba wakhe ukuze kuhlanganiswe lokuyimthonselanyana kwemithi banengi abacina sebesemajele sebegwetshelwe ukubulala bedinga inotho yegazi.
Into okumele uzibuze yona mhlobo wami yikuthi ungezwa ethi ulomuthi wokunothisa kwazi ukuthi utsho nje ehutshuza amanga aluhlaza tshoko okwenyongo yenkuzi yenyathi edle umahamba ngendlwana.
Zibuze njalo ukuthi kungani yena engaqali ngokuzinothisa ngoba kulumhlaba esiphila kiwo akekho ngitsho umuntu loyedwa ongafuni ukunotha, into okumele uyazi njalo uyiqaphele yikuthi ukunotha kuvela ekusebenzeni nzima, uze ujuluke emsisileni, njalo nxa uzisebenzela ngamandla ulala obukaBhuka ngoba ungela sici lomuntu, kulokuthi unothe ngokucuyacuya uhlala usevalweni.
Kambe nxa wanotha ngokubulala lamzukwana ubona ipholisa lisiza kuwe lizocela amanzi okunatha lukutshaya lukweqe uvalo lusabalale ngembambo uthole usuqhuqha angani ngumuntu ohlaselwe yintshongolo yebusika, kwesinye isikhathi lokulala kubanzima uphupha umbona umuntu owambulalayo.
Phela akukho mantshi omkhulu ukwedlula unembeza wakho, uyohlala uzithonisela baze bakubone usuzacile, uze ufanane lenkomokazi emunyisa iguqa ngesikhathi sendlala.
Ungezwa ethi woza ngizokupha umuthi wenotho umjikijele ngengqathayi zembuzi kumbe umtsakele ngamathe aqubuke ubuso, wena xwaya ukuthi inotho ivela ekusebenzeni gadalala njalo uzakuzwa labantu bekubuka uze ubeyisibonelo esigabeni.Ayixabene.
Umlobi ungamthinta ku: 0714355641
Online Reporter