adminYintatheli kaMthunywa
ZIlOKHU zimangele izakhamizi zeFort Rixon ngemva kokuba umuntu lomfowabo bebhaxabulane kwaba luthuli kubangwa ukuthi omunye ukhanyise omunye ngesibane ebusuku.
Kubikwa izelamani zakoMbewe zigiqane phansi kulandela ukukhanyisana kwazo ngesibane ngesikhathi ziphambana omunye esuka ngakibo omunye engena.
UMthunywa uzwe ukuthi omdala ukhanyise omncane kulokuthi bakhulumisane kuhle omunye wahle wathethisa omunye okuyikho okubangele ukuthi balwe andubana omunye atshiselwe indlu.
Ekhuluma lentatheli kaMthunywa uPhumani Mlilo uveze ukuthi lokhe emangele ngabantu banye abatshayane engani ngumuntu otshaya imamba engene endlini.
“Kube yisiphansi phezulu koMbewe ngesikhathi omdala obesiya ngakibo ehlangana lomuntu ephuma khona wasemkhanyisa uthe ebuza ukuthi ngubani umnawakhe wahle wamsukela wamthethisa ngenhlamba ezesabekayo.
“Lokhu yikho okwacunula umfowabo wamtshaya ngenduku indlebe yephuka, walimala esiphongo njalo amazinyo amabili axega wadabuka lomlomo.
“Omakhelwane bathe belokhu besakhulumisana labo umfana omncane wagijima wayathatha isikhuni somlilo wayalumathisa indlu yomnewabo okwabangela ukuthi kutshe ezinye imphahla lanxa omakhelwane baphanga bazama ukucitsha,” kulandisa uMlilo.
Imizamo yokukhulumisana lesikhulumi samapholisa esabelweni seMatabeleland South ulnspector Philisani Ndebele yehlule.
Online Reporter