Online Reporter
Ethel Ncube
NGENXA yokungafuni ukwaliwa kulendoda yeZhombe eqonde lapho okuhlala khona isithandwa sayo silele phakathi yafika yathela indlu iphethulo qede yayilumathisa.
Isehlakalo lesi senzakale ngoMvulo kuyonale iviki ngemva kokuba uNyasha Chaza exabane lesithandwa sakhe uPhumuzile Kufaulele oleminyaka engu-29 yokuzalwa waquma ukuthi ayemtshela endlini ahle amqede ebusuku.
Kuzwakale ukuthi uChaza waqonda ezitolo lapho okuhlala khona uPhumuzile wamfica eselele wadonsa isivalo wasibopha qede lapho wathela iphethulo indlu yonke waseyilumathisa wafulathela etshiya uPhumuzile ephakathi.
Ngenhlanhla omakhelwane bavuka bacitsha umlilo kodwa bathola uPhumuzile etshile wathwalela esibhedlela seKwekwe lapho asesimeni esingekho sihle.
Intatheli ixhumane lesikhulumi samapholisa eMidlands uInspector Emmanuel Mahoko oveze ukuba abantu bangaba lengxaki kumele bazame ngazo zonke indlela ukukhumisana umlotha ngokukhulumisana hatshi ngokulwa.
“Sidinga uNyasha Chaza olecala lokuzama ukubulala uPhumuzile Kufaulele ongabe embonile sicela abikele amapholisa aseduzane laye.
“Sicela ukuba uzulu nxa ethe waba lohlupho bebabili badinge omunye ongabancedisa ukuxazulula udaba lwabo hatshi ukulwa ngoba kucina kudala ukuba omunye alimale kumbe alahlekelwe yimpilo,” kutsho uInsp Mahoko.
