adminFairness Moyana
KULOMTHUNGAMELI wezisebenzi zenkampanini yeCoalbrick eHwange obonga amadlozi akwabo ngokuba ngophilayo ngemva kokuvalelwa phakathi kwendlu yamalahle yizisebenzi ebeziphose amajogwe phansi.
UMnunzana Tawanda Chinyemba uphume manayinayi ngemva kokuvalelwa kule indlu ngumsolwa uJustine Muleya loTinomudaishe Munhira, andubana avulelwe ngesinye isisebenzi esimuzwe ehlaba umkhosi edinga usizo.
Kubikwa omsolwa laba bathi ngemva kokubona umamangala engena kule indlu yokugcinela impahla bagijima bayamvalela phakathi besola ukuxotshwa kanye lokungaholiswa imali yabo.
Kuzwakale ukuthi mhlaka 5 Nkwenkwezi lonyaka uMuleya lo Munhira bafunyanwe bengelacala ngenxa yokuswelakala kobufakazi nanko phela baliphika lelicala.
Umtshutshisi uFadzai Maradze ubikele umthethwandaba ukuthi kwathi ngemva kokuvalela umamangala ababili laba batshaya utshani batshiya umamangala ehlaba umkhosi.
Ngemva kwemizuzu embalwa umamangala wasizwa nguMathias Nyelele omunye walezizisebenzi wasembikela ukuthi ubone lezizisebenzi zivala lapho noma nje ubengakwazi ukuthi zivalela umkhulu wakhe.
Umsolwa uMuleya ubemiswe phambi kukamantshi uPortia Mhlanga emthethwandaba ngoLwesine esetheswa lelicala ubike ukuthi wayengajonganga ukulwa lomamangala kodwa wayedlala laye njengokuba babengabangane.
“Mhlonitshwa, umamangala usuke wathatha udaba lolu ngentukuthelo kodwa mina ngangidlala laye njengomuntu esisebenza sonke.Bengingakhangelelanga ukuthi engathathela udaba lolu phezulu ngakho ngiyaxolisa ngengakwenzayo,” kutsho uMuleya.
Umsolwa ugwetshwe ukuthi ayehlala inyanga ezisithupha andubana umantshi athi kumele asebenze amahola angu-210 enkambeni yamapholisa eHwange.
Online Reporter