admin
INHLANGANISO yezempilakahle emhlabeni iWorld Health Organisation (WHO), ithi izinyanga ezizayo zisazoba nzima njengoba amazwe amanengi eseqalile ukubona izibalo zababanjwa yiCovid-19 zisenyuka.
UMqondisi-jikelele we-WHO, uDokotela Tedros Adhanom Ghebreyesus, uthe amazwe okubukeka sengathi azoba senkingeni kakhulu yilawo alezitshengiselo zokuthi asengozini yokuthi ahlaselwe yisivunguvungu sesibili seCovid-19 khathesi.
Uthe manengi kakhulu amazwe aseqalile ukubona izibonakaliso zokuthi kungenzeka ahlaselwe yisivunguvungu sesibili seCovid-19.
“Izinyanga ezizayo zizakuba nzima kukanti amanye amazwe sekubonakele ukuthi azathwala nzima kakhulu kulamanye. Manengi kakhulu amazwe khathesi alezibalo zababanjwa igcikwane leli ezenyukayo. Izigulane ezinengi kuwo sezilaliswe ezibhedlela emagunjini abadinga ukunakekelwa okuthe xaxa. Khathesi sisekuMfumfu okutsho ukuthi uma isimo siqhubeka ngalindlela kuzakuba lenkinga yokusilela kwemibheda ezibhedlela,” kutsho yena.
Unxuse abaholi bamazwe ukuthi bahlale besiqaphile isimo emazweni abo, uma kusiba lesidingo baphange bathathe amanyathelo afaneleyo okunqanda ukusabalala kwaleli gcikwane.
Izibalo zangemva zikhomba ukuthi bangu-42 million emhlabeni ababanjwe yiCovid-19, abatshonileyo bangu-1,1 million.
UDkt Maria van Kerkhove, weWHO e-Europe, uthe isimo sakwamanye amazwe ase-Europe siyakhathaza, njengoba sekukhona amazwe aselezibalo ezintsha zabalaleligcikwane.
“Kwamanye amazwe lezi zibalo ziba yingxenye yezibalo ebezikhona ngamahola angu-24. Lokhu kuyakhathaza impela. Imibheda ebekelwe ukulalisa izigulane ezidinga ukunakekelwa okuthe xaxa, uma ukwenyuka kwezibalo zabalaleligcikwane kungabe kulokhu kusenyuka ngendlela efanayo emasontweni ambalwa imibheda izobe isiphelile,” kutsho uDkt Van Kerkhove.
Amazwe okubikwa ukuthi aselezinkomba zokuthi angase ahlaselwe yisivunguvungu sesibili masinyane abalisa iSpain, Hong Kong leMexico.
Online Reporter