adminNAMIBIA — Owesilisa (24), uvuke inj’ebomvu wabulala unina, indodakazi yakhe elenyanga eziyisitshiyagalombili, inja kanye lenkukhu esiqintini se-Onambango, e-Ondangwa, kweleNamibia.
Kuthiwa lindoda iqale yaziphatha ngendlela engajwayelekile ngaphambi kokwenza lo monakalo kubo.
Iphephandaba leNew Era libike ukuthi indoda le iqale yagijimisa inja yayibulala isebenzisa insimbi ngemva kwalokhu yasibulala inkukhu andubana itshibilike iqonde unina.
Umetheswacala ngemva kwalokhu ubulele unina oleminyaka engu-58 uSuama Matheus Kanime kanye lendodakazi yakhe uSuama Joel.
Umetheswacala ubotshwe ngemva kokwenza amacala la njalo ukhangelelwe ukuthi amiswe emthethwandaba weOndagwa maduze nje ngengoba amapholisa esadinga abafakazi.
Isikhulumi samapholisa kulelo uSlogan Matheus uveze ukuthi umetheswacala wayelensuku ezine evakatshela unina evela eLuderitz andubana anxuse itshamali yakhe eyiyo ebilomntwana ambulalayo ukuthi izovakatsha ngakibo.
“NgoLwesithathu unina wananzelela ukungaphili kuhle kwendodana yakhe waya laye esibhedlela baphenduka ngehola lesitshiyamunwe munye ntambama. Efika waqhubeka elolaka wahlasela inja kanye lenkukhu wakubulala.
“Unina kametheswacala wasecela ukubeletha umntwana,” kutsho uMatheus.
Amapholisa aveze njalo ukuthi ngemva kokubulala inja lenkukhu, umetheswacala watshaya unina ngensimbi efanayo wafa andubana ahlasele indodakazi yakhe eyayisemhlane kanina.
Isikhulumi samapholisa siveze ukuthi ezinye izihlobo zikametheswacala kanye letshamali yakhe zenelisa ukubaleka. — Ubulembu
Online Reporter