admin
Ethel Ncube
KULENDODA yeChipale eBinga esele ithoba amanxeba ngemva kokuthelwa ngamafutha atshisayo ngumkayo kubangwa umlayezo ovela kumakhwapheni.
Isiga lesi senzakale emavikini amabili adluleyo lapho uMnumzana Ednus Mudiwa etholakale elemilayezo yothando evela kumakhwapheni wakhe okubangele ukuthi umkakhe uNkosazana Siphiwe Dube axhwathise amafutha amthele ngawo.
Ekhuluma loMthunywa omunye wezakhamizi zakule indawo obekhona kuthoniswa loludaba uMnumzana James Nleya uchaze ukuba ababili laba behluleka ukuxolelana.
“Mina ngabizwa nguMudiwa esetshiswe ngamafutha ngumkakhe. Kukhanya umkakhe wacela umakhalekhukhwini efuna ukufona wasevula imilayezo kuWhatsApp wathola indoda athandana layo isikhohlisana lomunye owesifazana.
“Umkakhe uthe ebona lokhu wathukuthela wafaka amafutha embizeni wabasela umlilo. Umkakhe wathi embuza ukuthi uphekani wathi upheka amagwinya kanti uyanya, wayefuna ukupheka yena.
“Uthe umkakhe elokhu elibele wasukumisa umphika eziko waqonda umkakhe wambuza ukuthi imilayezo ayibone kumakhalekhukhwini wakhe ngeyani uthe ezama ukumthela ebusweni wavika wamthela amathangazi,” kubika uMnu Nleya.
Uqhubekele phambili eveza ukuba undoda lo kazange ahanjiswe esibhedlela.
UMthunywa uxhumane lo Mnu Mudiwa ovumileyo ukuthi baxabana lomkakhe.
“Ngesiko lakithi ngivunyelwe ukuba lesithembo njalo umkami ubekwazi mhlophe lokho. Ngaphambanisa angali kodwa kwakumele sihlale phansi sikhulumisane hatshi ukuthi angenze isihluku esingaka.
“Okomfazi ngitsho ngithe azihambele ngakibo angitshiye ngiphila,” kutsho uMnu Mudiwa.
Ekhuluma lentatheli uNkszn Dube onguye owathela indoda ngamafutha owale wemba phansi ukuthi watshisa umkakhe.
“Angazi lutho mina ngodaba lolu njalo okutshelileyo ngicela umfonele angiphendulele mina angikho lapho,” kuphetha uNkszn Dube.
Online Reporter