adminDube Msilisi
KULENDODA yeSilalatshani, eFilabusi okubikwa ixathulwe ngamanzi abilayo enyaweni ngumkayo ngemva kokuba yamukele ucingo obeluvela kutshamali yayo.
Indoda le engumamangala uThabisani Ndlovu okungasatholakalanga iminyaka yayo yokuzalwa kubikwa itshiswe ngumkayo njalo engumsolwa uSiphiwe Gumede phakathi kwenyanga esanda kwedlula ngesikhathi besekamelweni labo.
Umtshutshisi wecala leli uMnumzana Jethro Mada ubikele inkundla yeFilabusi emavikini adluleyo ukuba ngosuku olungaziwayo kodwa phakathi kwenyanga kaNkwenkwezi umsolwa wemukela ucingo wahle wathelwa ngamanzi abilayo enyaweni.
Kubikwa ngosuku lolu olungaqanjwanga umsolwa wayehlezi lomkakhe. Bathe besahlezi ucingo lukamamangala lwasolukhala. Kubikwa umamangala wadobha lolocingo waqala ukunyenyeza okwenza umkakhe wahle wacabangela ukuthi mhlawumbe ukhuluma letshamali.
Kukhanya umsolwa kakuthandanga ukuzwa umamangala ekhuluma indaba zothando ecingweni ngakho wathatha amanzi abilayo wamqunga ngawo enyaweni.
Kubikwa umsolwa watsha unyawo okwabangela ukuthi ayebikela amapholisa ngesehlakalo lesi, umsolwa wabotshwa.
Ebuzwa ngumantshi uMnumzana Mzingaye Moyo umsolwa ulivumile icala lakhe wathi wenza ukuganga lokho ngenxa yobuhlungu benhliziyo.
Ngemva kokuzwa ubufakazi lobu umantshi ugwebe umsolwa ukwenza i-Community Service enkambeni yamapholisa okwamalanga angu-11.
Online Reporter