Online Reporter
Media Mpofu
INHLANGANISO yeBulawayo Pickleball Association (BPA) ibika ukuba izaqhuba imidlalo ezadibanisa intshantshu zalumdlalo kulesi sabelo mhlaka 9 Ncwabakazi, qede lapho libe lomqhudelwano omkhulu ngeviki elilandelayo.
Injongo yemidlalo le ngeyokuthuthukisa lumdlalo lokulolonga abadlali ukuthi bahlale belindele ukuyancintisa kwezinye inkundla bemele ilizwe. Kubikwa umncintiswano wakokuqala, ozabe ukoBulawayo eHornung Park eBurnside, kube sekulandela omunye ozadibanisa intshantshu eziphuma ezabelweni zonke zelizwe mhlaka 17 Ncwabakazi.
Umdlalo lo, owasungulwa ngo2023, usuthole ukusabalala endaweni ezinengi, nanko usudlalwa koBulawayo, eMatabeleland North, Matabeleland South, Mashonaland East laseMidlands.
Ngokubika kweBPA, kumidlalo yezabelo kuzancintisa abadlali bakoBulawayo labeHarare, lapho okuzakhethwa khona abazamela ilizwe kumincintiswano ezaqhutshelwa eSouth Africa.
Kuzancintiswana kumahlandla abesifazane labesilisa. Umongameli weZimbabwe Pickleball Association uMthandazo Ngwenya uthe inhloso yabo isekufinyeleleni imidlalo ye2028 Los Angeles Olympics lakuWorld Cup.
“Sisungula umdlalo wethu kusukela kwabasakhulayo ezikolo lasemphakathini. Ababalisi labafundi sebewamukele ngazo zonke izandla, ngakho sikhangelele ukuthi sisebenze ndawonye lenhlanganiso yeNational Association of Secondary School Heads (Nash) ukuze imincintiswano yethu ifake enhlelweni zayo zomnyaka,” kutsho uNgwenya.
Uthe okwakhathesi basalwisana lokuthi basabalale, bamukelwe endaweni zonke lokuthola usekelo.
“Ekudingeni usekelo, sincintisana leminye imidlalo esivele ikhona elodumo, kodwa kasilahli ithemba ngoba sikholwa ukuthi eduzane nje, abantu abanengi bazabe sebewulandela umdlalo we-pickleball.”
KoBulawayo izikolo ezidlala ipickleball yiDominican Convent High School, Eveline High School leWhitestone Primary.
Unobhala weBPA uTakunda Zhungu wazise ukuba umncintiswano ozayo umkhulu.
“Umbono wokuqhuba imidlalo yezabelo wabekwa ngomnyaka odluleyo kodwa sehluleka ukwenza lokhu ngenxa yokusilela kosekelo lwemali. Ngakho, lonyaka sizimisele ukuthi sigcwalisise isinqumo sethu, sibise ipickleball ebantwini.” Njengomdlalo ozacathula kuleli, kukhangelelwe ukuthi kumalanga alandelayo kwengezwe usekelo labalandeli.
