Online Reporter
YiNtatheli kaMthunywa
AMAPHOLISA akoBulawayo asexwayise abafundi abasezikolo ezehlukeneyo ukuthi bangaphatheki ekulweni okuvame ukubakhona ngosuku lokuvalwa kwezikolo edolobheni.
Ekhuluma kumkhankaso wokuthula, isikhulumi samapholisa koBulawayo uInspector Nomalanga Msebele, ukhuthaze abafundi abasezikolo ezisedolobheni ukuthi batshiye umkhuba wokulwa ngosuku lokuvalwa kwezikolo.
“Izikolo ziyavalwa mhlaka 7 Ncwabakazi (lamuhla), kungumkhuba wabafundi bezikolo ezisedolobheni koBulawayo ukuthi nxa zivalwa, abafunda ezikolo ezifana le Milton, Gifford, Hamilton, Founders bayahlangana enzikini yedolobho baqale ukuzwana amandla besilwa bengamaqembu endaweni eziseHaddon and Sly.
“Njengamapholisa sizabe sigcwele indawo yonke, kasifuni kubona abantwana besikolo abazabuthana,” kutsho uInsp Msebele.
Isikhulumi samapholisa sibuye saxwayisa abadala ukuthi baxwayise abantwana ngobubi bokulwa.
“Sicela abadala baxotshe abantwana laba baphume edolobheni baye ngakibo ngoba yikho lapho abaphephe khona.
Omunye umfundi weGifford uqede ithemu yonke ephuke unyawo kunye lesandla ngenxa yokulwa lokhu.
“Kuke kwaba lomfundi owabulala omunye kuminyaka edluleyo eFounders High School ngaleso sizatho, sicela abadala baxotshe abantwana baye emakhaya.”
Wengeze ngokuthi amapholisa kasoze enelise ukubakhona izitalada zonke, ngaleso sizatho kungumlandu womuntu wonke ukuncedisa ukuthi kungabi lokulwa kwabafundi.
