admin
Cornelius Luphahla
AMABANDLA akoBulawayo asehlome aphelela ngamalungiselelo okuthakazelela ikhefu lePhasika njalo inengi lawo lilenhlelo ezilungiselelwe ukukhumbula ukufa kukaJesu Khristu.
UMthunywa uxhumane lenkokheli zamabandla ambalwa agoqela iEagle Life Assembly, Abundant Life Revival Mission International, Divine Love Ministries International, City of Liberty Apostolic Church kanye lamanye atshiyeneyo amema uzulu ukuba ahlanganyele lawo.
UMthunywa ukhulumisane loMfundisi uErnest Zichawo webandla le Eagle Life Assembly wachaza ukuthi njengebandla bazabe belomkhosi omkhulu kakhulu njalo bamema uzulu wonke.
“Thina njengebandla sizabe silenkonzo enkulu yokukhumbula ukufa lokuvuka kukaJesu Khristu ngakho-ke sikhuthaza uzulu wonke ukuthi abekhona enkonzweni lezi. Inkonzo lezi zizakuba eZimbabwe International Trade Fair koBulawayo kuHall 1.
“Lapha-ke kuzabe kuloProphet Blessing Chiza lomkakhe kanye labazalwane abavela emazweni agoqela iZambia, Namibia, Botswana kanye lasendaweni ezitshiyeneyo kuleli ezibalisa iVictoria Falls, Gwayi, Maphisa, Lupane, Beitbridge kanye lezinye indawo ezehlukeneyo. Ngalokhu-ke inkonzo zethu zizaqala ngoLwesine ntambama zize ziyekuma ngeSonto ntambama. Inkonzo zizakuba khona lemini.
“Okunye njalo uProphet Chiza uzabe enika abantu bonke i-anointing oil kanye lama-wrist bands mahala abuye njalo afundise izifundo ezitshiyeneyo,” kutsho uMfundisi uEarnest.
UMfundisi uSibanda owe-Abundant Life Revival Mission International ubikele intatheli ukuthi bona njengebandla bazakuba lenkonzo ngekhefu lePhasika.
“Thina sizakuba lenkonzo okwamalanga amathathu ezaqala ngoLwesihlanu ize iyephela ngeSonto. Enkonzweni le sizabe sitshumayela sibuye sifundisane ngokuthi abantu kufanele baphile njani emhlabeni bengakayi ezulwini kanye langokuqakatheka kukaJesu Khristu.
“Okunye njalo sizakudla isidlo okuyikukhumbula uJesu ukuthi nguye owasisizayo ngokusifela esihlenga ezonweni zethu. Ngakho-ke inkonzo le izakuba ebandleni lethu elikhulu elikhonapha koBulawayo,” kutsho uMfundisi uSibanda.
Ebuzwa ngamalungiselelo ekhefu lePhasika uMfundisi uMafu oweFamily Convenient Church ukhulumisane loMthunywa waveza ukuthi bazakuba lenkonzo enkulu njalo bamema uzulu.
“Thina sizakuba lenkonzo enkulu kakhulu ngakho simema uzulu wonke ngoba sizabe sifundisa ngevangeli leqiniso sikhuthaza abantu ukuthi babambelele kuJesu Khristu njengoba kunguye owasihlengayo ezonweni zethu. Inkonzo le izakuba eZITF kuHall 3 okuyikho esizabe sikhonzela khona.
“Inkonzo zethu zizaqala ngoLwesihlanu ngo 9 ekuseni ize iyephela ngo8 ntambama. Ngalokhu-ke izaqala ngoLwesihlanu iyephela ngeSonto ntambama.
“Enkonzweni le kuzakuba lezifundo zabafundisi kanye lezabazalwane bonke njalo kuzadliwa isidlo lewayini,” kuchaza uMfundisi uMafu.
Ekhuluma loMthunywa uApostle Brighton Dube owebandla leDivine Love Ministries International uchaze ukuthi labo bazakuba lomkhosi omkhulu wokufundisa ngokufa lokuvuka kukaJesu.
“Thina sizakuba lomkhosi omkhulu eCommunity of Christ Church eNkulumane 12 lapho esizabe silomkhosi omkhulu wokufundisa ukunqoba ngesiphambano okuyikufa kukaJesu Khristu.
“Lapha siyabe sikhuluma njalo ngokufa lokuvuka kukaJesu. Inkonzo yethu izaqala ngoLwesihlanu ize iyephela ngeSonto,” kuphetha uApostle Dube.
Online Reporter