Online Reporter
Fungai Muderere
UMQEQETSHI weBulawayo Chiefs, uJohn Nyikadzino, uhlonitshwe ngesicoco ngoMgqibelo odluleyo, ekhethwa njengomqeqeshi owedlule bonke ngomsebenzi ngoMpandula, kuligi yeZifa Division One, emhlubulweni ongezansi yelizwe.
UNyikadzino uphiwe isicoco lesi esihamba lomvuzo we-US$200, ngemva komdlalo wabo leMegawatt odlalwe enkundleni yeBulawayo Chiefs Village.
Umqeqetshi lo uthe uzizwa ephakanyisiwe njalo isicoco sakhe sizamnikeza umfutho wokuthi aqhubeke ekhuza iqembu lakhe lize libeyintshantshu yeligi, liphenduke kuPremier League.
“Kutsho okukhulu ukuphiwa isicoco lesi. Konke kumayelana ngemizamo yethu yokuzwisisana njengeqembu. Ngibonga kwamanye amalunga eqembu asebhentshini lezingcitshi zokuqeqetsha labadlali bami. Sizaqhubeka ngokusebenza nzima njengeqembu,” kutsho uNyikadzino.
IBulawayo Chiefs inqoba iMegawatt nge 2-0, yengeza imiklomelo. Khathesi isile-67, ilandelwa yiHwange ele-65. IHwange ithole imklomelo yonke ngempelaviki, nanko iqembu obekumele lidlale lalo, i-Ajax Hotspurs selaphuma emncintiswaneni.
Amakhosi Amahle sekucaca ukuthi yiwo angathwala inkezo njengoba esenqoba maviki wonke. Isitha sayo esikhulu kuzakuba yiHwange, layo efuna ngokuphangisa ukuphenduka kuPSL.
Kunombolo yesithathu kungalane yamaqembu kuleNkayi United ephethe imiklomelo engu-59. Kweminye imidlalo, iBlackrock idlale ngokulingana leVictoria Falls, umdlalo uphele kuyi 1-1.
Emdlalweni we-Eagle Life leCasymn kuphethe kuyi 0-1. ITalen Vision imelane leNust kwaba yi 1-1, iBulawayo Warriors ibambe iZebra Revolution nge 3-2. EzePlumtree, iMainline FC, zidle Imbizo nge 1-0. Abafana beBosso 90 batshaywe 1-0 yiJordan Sinnot.
Impumela yemidlalo:
Blackrock 0 -0 Victoria Falls City, Eagle Life 0-1 Casymn, Talen Vision 1-1 Nust, Bulawayo Warriors 2-3 Zebra Revolution, Bulawayo Chiefs 2-0 Megawatt, Imbizo 0-1 Mainline, Hwange 3-0 Ajax Hotspurs, Bosso 90 0-1 Jordan, Nkayi United 1-1 Bulawayo City.
