Online Reporter
Nkosilathi Sibanda
UKUSUKA kwakhe kuleli, eqonde eSouth Africa, unozinti u-Elvis Chipezeze wayeseboniswe imali njalo wafika wayithola.
Unozinti weqembu leMagesi FC, edlala kuligi yeBetway, ukhethwe waba ngumdlali owedlule bonke ngoLwesibili, lapho bedlala le-Orlando Pirates, kowenkezo yeCarling Black Label. Isicoco lesi silomvuzo wemali engange-R100 000.
Loba ephiwe isicoco, iMagesi FC inqotshwe 2-1. Lokhe kwaqalisa lumncintiswano kulisizini, uChipezeze usethole isicoco lesi okwesithathu.
Ekutholeni kwakhe isicoco ngemva komdlalo, uChipezeze ubonge abadlali kunye labasekeli beqembu lakhe.
“Ngiyabonga ngothando langosekelo esiluthola kubadlali. Usekelo lwenu lusebenze kakhulu kumidlalo yalumqhudelwano. Asiqhubekeni sikwenza lokhu ukuze lathi sidlale ngcono,” kubika unozinti lo enkundleni zokuxhumana ebulenjini.
Kusenjalo, inengi labalandeli benguqu eSouth Africa laseZimbabwe lincome umdlalo kaChipezeze. Abalandeli bavumelene ukuthi ngempela bekumele aphiwe isicoco somdlali owedlule bonke.
“Amhlophe Elvis. Ngicela wakhe okubambekayo ngaleyomali,” kutsho uSolly Mabuza kuFacebook.
Omunye, uShadreck Mutavhatsindi uthe: “Umqhudelwano lo kumele ubizwe ngokuthi yiCarling Chipezeze Cup. Kumele bakwenze u-ambassador weCarling Black Label.”
