Uza lazo uZee Wengoma

IPHEPHANDABA likazulu njengoba lidume ngezigijimisa igazi kule iviki lize lazo njalo. Angithi nje lize lengadlangadla yejaha elicula umculo omutsha owe-house kwasa. Kayiculi nje lindoda ikhumbuza uzulu inyoni yezulu ngokwayo.

Kambe kungaba ngubani umculi wodumo lo ngaphandle kukaZibusiso Moyo ijaha mdabuko elidume ngokuthi ngu Zee Wengoma. Othanda ukuzijabulisa kule iviki nansi ingxoxo ejulileyo phakathi kwentatheli yephephandaba likazulu uCornelius Luphahla (CL) lomculi lo uZibusiso Moyo (ZM).

CL: Jahelibanzi akuxoxele uzulu ngamafitshane mayelana lembali yomculo wakho?

ZM: Mina ngazalelwa esigabeni sakoKhame ePlumtree okuyikho engakhulela khona njalo. Ekukhuleni kwami ngangivele ngithanda ukucula kakhulu noma nje ngangingakaziwa ndawo. Ngaqhubeka-ke ngezomculo ngaze ngasungula iqembu lami,  kwathi ngo2011 ngakhipha idlalade.

CL: Umphakathi uthanda ukwazi ukuthi kungani wakhetha ukucula umculo we house-kwasa?

ZM: Okwenza ngakhetha ukucula umculo lo yikuthi yiwo engabona ngiwenelisa kakhulu njalo ngananzelela ukuthi umculo lo kawuvamanga kuleli ngakho nxa ngize lawo uzajabulisa uzulu. Okunye njalo umculo lo mina ngokwami uyangijabulisa njalo ngiyawuthanda yikho ngakhetha ukucula wona.

CL: Lokhe waqala ukucula sowakhipha amadlalade amangaki jahalakithi?

ZM: Njengomculi osasungula sengikhiphe idlalade elilodwa elika2011 elithi Under Age. Okwakhathesi ngisapheka elinye njalo elizajabulisa uzulu.

CL: Wandise ukudlalela ngaphi ingoma zakho njengomculi?

ZM: Ingoma zami ngandise ukuzidlalela kuma-shows atshiyeneyo ikakhulu kweleSouth Africa, kweleBotswana kanye lakwelakithi.

CL: Abantu bathini ngomculo wakho njalo ukhangelele ukwenzelani uzulu?

ZM: Abantu bayawujabulela umculo wami njalo bangikhuthaza ukuthi ngiqhubekele phambili ngibajabulisa ngoba ngenza umsebenzi omuhle kakhulu. Ngalokhu ngiphekela umphakathi idlalade elitshisayo engilincediswa ngabaculi abagoqela uSlizer, uMingo, uVivian kanye labanye abaculi.

Ngikhangelele njalo ukuthi mhla ngikhipha idlalade lami engiliphekayo ngikhiphe kunye leDVD yedlalade lami elithi Under Age ukuze abantu bazibonele ngamehlo umsebenzi wami.

CL: Kungani upheka idlalade ulabaculi abahlukeneyo ungaziphekeli wedwa njengabanye abaculi?

ZM: Okwenza ngipheke idlalade leli ngincedisana labanye abaculi yikuthi izandla ezinengi zilendima okuveza ukuthi nxa ngidinge abancedisi ngizakhipha into yomhlaba ngokwayo. Okunye njalo yikuthi ngijonge ukubambana labaculi bonke ngoba ukubambana kuletha impumelelo kithi njengabahlabeleli.

CL: Bunzima bani oyake uhlangane labo njengomculi njalo nkuthazo bani oyipha abaculi abasasungula?

ZM: Ubunzima engihlangana labo njengomculi yikuthi abantu basuka bathathe umculo wami bawuthengise ngokungekho emthethweni njalo ngentengo ephansi. Lokhu kudala ukuthi ngingatholi imali ethe xaxa nxa ngithengisa umculo wami ngoba abantu sebejayele ukuthenga otshiphe kakhulu ontshontshiweyo.

Kubaculi abasasungula ngithi kababambelele emculweni noma behlangana lobunzima bengadeli ngoba umsebenzi lo unzima.