Online Reporter
Bhekimpilo Tshalibe
KULENDODA eleminyaka engu-20 evela ePumula South koBulawayo egwetshelwe ukuyapika iminyaka engu-5 ejele ngemva kokutholakala ilecala lokuzama ukubulala umngane wayo kubangwa umakhalekhukhwini.
Kubikwa mhlaka 23 Mfumfu 2024 ePumula South, koBulawayo umsolwa uNathan Phiri wazama ukubulala umngane wakhe uMkhanyisi Ndlovu oleminyaka engu-23.
Kuzwakale ukuthi uPhiri wahlahlela umamangala ngehloka ekhanda njalo wasemtshaya ngezibhakela langamampama umzimba wonke esola ukuthi kungani eselande umakhalekhukhwini ayemeboleke wona. Kuzwakale ukuthi umamangala loPhiri babenatha bobabili utshwala ngaphambi kokuthi kube lokungezwani.
Kubikwa uNdlovu esebuze umakhalekhukhwini wakhe uPhiri wathukuthela kakhulu wamhlahlela ngehloka ekhanda andubana amtshaye umzimba wonke ngezibhakela lamampama okwabangela ukuthi acine ethwalelwa esibhedlela ukuze ayekwelatshwa.
Kusenjalo kulendoda eleminyaka engu-61 evela eRangemore koBulawayo egwetshelwe ukuyapika iminyaka engu-20 ejele ngumthethwandaba wakoBulawayo ngemva kokutholakala ilecala lokudlwengula. Kubikwa mhlaka 21 Lwezi 2024 ngehola lika-3 ngemva kwemini umsolwa waya emacansini okungekho emthethweni lomntanakhe ogula umkhuhlane wengqondo oleminyaka engu-24 ongenelisiyo ukwenza isinqumo emthethweni.
Isehlakalo lesi senzakala endlini kamsolwa lapho afika wamvala umlomo lamakhala, umamangala elele wasemdlwengula.
I-National Prosecuting Authority of Zimbabwe ikhuthaze abantu ukuthi bebambane balwe lamacala okudlwengula.
“I-National Prosecuting Authority of Zimbabwe ikhuthaza uzulu ukuthi abambane ekulwiseni amacala okudlwengulwa lokuhlukuluzwa emakhaya. Ngokubambisana singakha umphakathi ophephileyo,” kutsho isitatimende se-NPAZ.
