Online Reporter
Nkosilathi Sibanda
WAYIZWA ubunandi bayo inkezo yeChibuku ngesizini ka2019, uzafuna ukuthi aphinde ukuyithwala lonyaka, ekuqembu elifanayo.
Kungabe kuyinhloso yomqeqetshi weHighlanders uPieter De Jongh, ophenduke kuleliqembu kumaviki ambalwa adluleyo. Njengoba umkhankaso weCastle Lager usuyehlule, osekusele kuHighlanders yikuthi izame inhlanhla kumqhudelwano weChibuku Super Cup.
Akula ngenye indlela uDe Jongh angenelisa ngayo ukujabulisa abalandeli ngaphandle kokuthi athwale inkezo le, okunguye owenza ukuthi ifike emahofisini eHighlanders ngo2019.
Kubalandeli beHighlanders, kulumdlalo bazafuna ukubona ukuthi umqeqetshi omutsha ulandeni eqenjini. Nxa wenelisa ukubenza babezintshantshu zeChibuku ngo-2019, pho kulisizini uzakwehlulwa yini?
Umqeqetshi lo uqale umkhankaso walinkezo ngeSonto, ebhekane labafana besikolo iHerentals, enkundleni yeNyamhunga. Umdlalo lo wedluliselwa phambili ngenxa yokuthi ekuqaleni kwakuhlelwe ukuthi uzaqhutshwa ngekhefu lamaqhawe ngoNcwabakazi.
Omunye umdlalo okhona kuChibuku Super Cup ngempelaviki ngophakathi kweChicken Inn leZPC Kariba enkundleni efanayo ngoMgqibelo. Ezizanqoba zizakuya kusigaba sama-quarter final.
Kulesi isigaba sekuleDynamos, MWOS, Manica Diamonds, Bikita Minerals, Scottland leTriangle United.
U-De Jongh ulethemba njalo usebeke isicelo kubalandeli, ukuthi bengekeli ukukhuza iqembu loba lizabe lidlalela khatshana.
NgoLwesine uzabeka umbono wakhe ngomdlalo weChibuku Super Cup, lapho azabe elomhlangano lentatheli zomdlalo kanobhutshuzwayo.
Njengoba uDe Jongh efice iHighlanders ilabadlali ababuthundu, abehluleka ukuhlohla, kumele abaxwayise ukuthi emidlalweni yenkezo enjengeChibuku Super, okumqoka yikuhlohla. Iqembu elingahlohliyo kaliyindawo kumiqhudelwano le.
Amathemba azakuba kubadlali abatsha uBenjamin Oluwarotimi Adeogun, oyinzalo yeNigeria, owavela kuGwanda Pirates. Umdlali lo kubonakele ukuthi ubukhali phambili kwegedi. Nxa engaphinda ukuhlohla, engayifikisa ku-quarter final iHighlanders.
NgoLwesithathu emini, umqeqetshi weChicken Inn uJoey Antipas ubelengxoxo emfitshane leZimpapers Sports Hub andubana agijimele ukuyalolonga kwenye inkundla koBulawayo.
Loba ubesejahe ukuya emsebenzini, uthe amalungiselelo aqhuba ngendlela ayihlelileyo ngakho kumele balande ukunqoba eKariba.
“Njengayo yonke imidlalo esilayo, lo siwulungiselele. Kimi kufana lokuthi siqalisa kutsha njalo kumele sitshengise ukuthi siqine okunganani lokuthi siyayifuna inkezo.”
