Online Reporter
Ethel Ncube
UMCULI kamaskandi oyisizalwane seSouth Africa owazakala ngokuthi ngu-Iputsununu uzabe ekhona kumcimbi wendondo zikaDakamela 2025 ozabanjelwa eNkayi.
USamukele Majola owazakala ngokuthi Iputsununu ovela kwaZulu Natal usebike ukuba uzabe ekhona eNkayi, eZimbabwe elande umcimbi wendondo zenduna uDakamela.
“Mahlabezulu, ngiyathaba ukuba nginxusiwe kumiklomelo kaDakamela lonyaka lapho engizabe ngiyisethekeli khona njalo ngijabulisa uzulu. Ngiyalinxusa lonke balandeli bomculo wami labasekeli beBosso ukuba asambeni siyejabula koDakamela, eNkayi. Iphasipoti yami ngilayo okukhombisa ukuba ngiyahamba khonale lobakanjani angiphuthi, lami ngizabambisana indlela labanye ngilubhekise khonale mhlaka 4 lo5 Mabasa,” kubika Iputsununu.
Uqhubekele phambili ebika ukuba yena uselinde ilanga kuphela.
“Bafowethu mina ngilinde ukuba nxa amalanga esesondele ngingene indlela yeZimbabwe ngiye emcimbini omkhulu wenduna uDakamela. Ngiyathembisa ukuba usuku lolu ngeke lungeqe, ngizabe ngikhona ngihlabela uMantengwane khonale. Lizabe lizizwela ngizihlabelela, abangangaziyo bangibone mathupha.
“Asisondeleni sonke siyemcimbini omkhulu weZimbabwe eNkayi koDakamela siyejabula ndawonye siphakamisa okwakithi, umculo kanye lamasiko ethu. Ukutshelwa yikuncitshwa, asambeni sonke siyezibonela emcimbini okumunyethweyo,” kuphetha u-Iputsununu.
