Online Reporter
Ethel Ncube
UMHLABELELI odumileyo ngomculo kamaskandi ukhethwe ku-Top 50 kumncintiswano weMother of all Maskandi Festival eMzansi Afrika.
UZinjaziyamluma ungena okwesibili kumncintiswano lo njalo udinga ukuxhaswa ngokuvotelwa.
Ekhuluma ekhasini lakhe leFacebook uZinja ubike ukuba ucela ukusizwa.
“Ngicela sibambaneni sizwe sakithi lingivotele kuMother of all Maskandi Festivala ukuze ngikwazi ukuhamba ngiyebonisa esilakho nxa ilanga lomncintiswano selifikile mhlaka 5 Mabasa. Nxa lingivotela thumela umlayezo obhalwe AA kunombolo le49979 umlayezo ubiza R1,50. Ngicela sonkeni sihambeni siyevota lento ayisiyoyami ngedwa kodwa nxa nginqobile ngokwethu sonke siphakamise isizwe sethu.
Asibeni moya munye sivoteni ngokuthula.
Uqhubekele phambili ecela ukuba abantu kabavote ngobunengi.
“Bafowethu asiphamise umculo kamaskandi ungene ezingeni eliphezulu. Nxa ngivotelwa lapha angizimeli kodwa ngimela isizwe sakithi seZimbabwe. Zinike ithuba nsuku zonke unxuse labanye sifakeni amavoti abemanengi. Ngifisa sinqobe sithole umvuzo. Ngifisa umoya wokubambana lowokuthula sibendawonye sivote. Ngiyazehlisa kini lonke asibambisaneni siyevota sonke ukuze sikwazi ukuyaphatheka emcimbini kaMaskandi Festival. Ngibonge kwabazangisiza ngiyazi lingeke lingidanise, asivoteni bakwethu,” kubika uZinja.
