admin
RIMWE boka revakadzidza paPrince Edward School, muHarare rePrince Edward Old Boys Association rakaronga mitambo yeSoccer 5 Aside Tournament nemujaho weFamily Fun Run/Walk nechinangwa chekutsvaga mari yekuvakisa chidziro chejurahoro rechikoro ichi.
Mutungamiri weboka iri, Clint Robinson, anoti vari kutsvaga mari inosvika US$40 000 iyo vanoda kuzovakisa jurahoro pachikoro ichi.
Anoti boka iri rakaumbwa nechinangwa chekuvandudza chikoro ichi icho chakavabatsira muhupenyu hwavo.
Chidziro chejurahoro ichi chinoda kuvakirwa pane rimwe divi rechikoro apo pane fenzi iyo yakaiswapo mugore ra1949.
“Takazviona zvakakodzera sevana vakadzidza paPrince Edward kuti titsvage mari tigobatsira kuvandudza chikoro chedu ichi. “Kuti tisvike patave isu vamwe muhupenyu hwedu chikoro ichi chakatiumba zvakasimba saka tinoda kuchivandudza senzira yekuchisimudzira.
“Tiri kutarisira kuunganidza mari inosvika US$40 000 yekuita basa iri saka takaronga mitambo miviri inoti yenhabvu nemujaho wekumhanya svondo rino,” akadaro Robinson.
Zvikwata zvese zvinoda kukwikwidza mumitambo miviri iyi zvinofanirwa kubhadhara mari yekunyoresa.
“Mari ichabhdharwa nezvikwata zvakasiyana iyi ndiyo imwe ichashandiswa mukuvandudza chikoro ichi.
“Tinoshuvira kuti zvatiri kuita izvi zvigokurudzira vakadzidza kune zvimwe zvikoro kuti vashande kuzvivandudza,” akadaro Robinson.
Online Reporter