Online Reporter
Kingstone Mapupu
VANHU vatatu vemhuri imwe, kusanganisira amai nemwana wavo, vakafa mushure mekuyeredzwa nemvura vari mungoro apo vaizama kuyambuka rwizi Sebakwe urwo rwaive rwakazara kuKwekwe nguva pfupi yadarika.
Tsaona iyi yakaitika nemusi wa25 Ndira mumugwagwa weMopani- Lozani kuKwekwe.
Vakashaika ndiNomatter Denhere (20) nemwana wake, Gotore Tatenda, uye naTrymore Ngwenya (34) vose vaibva kupurazi reLozani kuKwekwe.
Mutauriri wemapurisa kudunhu reMidlands, Inspector Emmanuel Mahoko, vanoti Everson Phiri (36) naClever Nyongani vakakwanisa kushambira ndokubuda kunze kwerwizi apo vamwe vatatu ava vakayeredzwa vari muchikochikari ndokufa.
“Mhuri iyi yaiva muchikochikari kuchinaya ndokunoedza kuyambuka rwizi rwaSebakwe rwaiva ruzere apo chikochikari chakatorwa nemvura vari mukati. Everson Phiri naClever Nyongani vakakwanisa kushambira ndokubuda mumvura apo vamwe vatatu ava vakabva vayeredzwa vari mukati mechikochikari,” vanodaro Insp Mahoko.
Phiri akazomhan’ara nyaya iyi kumapurisa.
Insp Mahoko vanoti mutumbi waNgwenya wakazowanikwa zuva rakatevera wakapaikira pakati pemiti murwizi rwaSebakwe.
Mutumbi waDenhere newemwana wake haisati yawanikwa uye mapurisa eSub Aqua Unit ari kubatsirana nemamwe mapoka kuitsvaga.
“Semapurisa, tinoramba tichikurudzira veruzhinji kuti vasayambuke nzizi dzakazara nekuti vanoyeredzwa kana kudyiwa nemakarwe nezvimwe zvikara zvinowanikwa munzizi. Tinoti upenyu ishongakamwe, ukafa haudzoke,” vanodaro Insp Mahoko.
