Online Reporter
Arron Nyamayaro
MAPURISA ari kupa yambiro yakasimba kune vanhu vane mukurumbira nevamwewo veruzhinji kuti vasafambise mashoko asiri echokwadi padandemudande reSocial Media.
Izvi zvinotevera nyaya yemumwe munhu ane mbiri padandemutande anogara kuSouth Africa, Norma Nyce, uyo anozivikanwa saMai Jordina.
Akashoropodzwa zvakanyanya zvichitevera mashoko aakatumira padandemutande ekuti haana kubatwa zvakanaka nevashandi vebhazi vekambani yeCAG apo aibva kuHarare achienda kuChegutu.
Pakutanga akati vashandi vekambani iyi havana kumubata zvakanaka, asi zvikazoonekwa kuti bhazi iri raive reimwe kambani.
Achibvuma manyepo aaive ataura, Mai Jordina anotsanangura achiti: “Ndakafunga kuti raive bhazi reCAG sezvo ndiro randinogara ndifamba naro, kusvikira ndatambira nhare kubva kune mumwe wemadirector eCAG mushure mekunge ndatumira mashoko angu padandemutande
izvo zvakaita kuti ndizive kuti ndaive ndakanganisa. Zvakabuda kuti bhazi iri randakange ndiri chikamu chekambani dzinoshandidzana.”
Zvichitevera chiitiko ichi, mutauriri wemapurisa munyika, Commissioner Paul Nyathi, vanosimbisisa kukosha kwekuti vanhu vamhan’are kutadzirwa kwavanenge vaitwa vachitevedza gwaro rinodiwa pane kugunun’una vachishandisa dandemutande.
“Hazvisi pamutemo kushandisa dandemutande kugadzirisa zvinenge zvichinetsa kana kumhan’ara. Tinokurudzira vanhu, kusanganisira vane mukurumbira, kuti vaende kumapurisa kuti vabatsirwe,” vanodaro.
Mune imwewo nyaya, mumwe munhu wekuBorrowdale, muHarare akatumira mashoko kuCAG, achiti ane umbowo hunotaridza mabhazi ekambani iyi aikwikwidzana kumhanya pamugwagwa.
Munhu uyu akati aikwanisa kukanda vhidhiyo racho padandemutande kana asina kuwana mashoko ari pamusoro penhare kana kuti kunowanikwa vakuru-vakuru vekambani iyi.
Yambiro yeZRP inotaridza tsekwende inokwanisa kuwira vanhu vane katsika kekungokanda mashoko, kusanganisira mavhidhiyo, ezvinhu zvavasina chokwadi nazvo paSocial Media.
Veruzhinji vari kukurudzirwa kuti vangwarire pamusoro pezvinhu zvavanotumira padandemutande sezvo zvimwe zvacho zvichigona kukanganisa vamwe vanhu kana kukonzerawo kusagadzikana kwezvinhu.
