admin
VARIMI vemasamba vanokwana 514 vekuHonde Valley, kuManicaland vakapihwa chiremerera chepamusoro cheUTZ and Rainforest Alliance Certification chekugona kurima zvine hunyanzvi izvo zvinoita kuti vange vachicherechedzwa pasi rose vachikwanisawo kutengesa zvirimwa zvavo pasina zvimhingamupinyi.
Chiremerera ichi chakaitwa kuburikidza nekushanda kwesangano reSNV rakabatana nereHonde Valley Smallholder Development Company pasi pechirongwa chinokotsverwa neDanida cheRural Agriculture Revitalization Project (RARP). Sangano reRARP riripo kusimudzira varimi vechidiki vemasamba kuti vakwanise kutengesa zvirimwa zvavo kumisika yepamusoro kunze kwenyika.
VaCloffas Nyagumbo vanova mupi wemazano kuSNV vanoti vatengi vemasamba vakuru pasi rino vakazvipira kutenga chirimwa ichi kubva kuvarimi ava vachitevedzera mitemo inodiwa zvichifambirana nekusanduka kwemamiriro ekunze.
“Varimi vakapihwa nguva yekutevedza zvisungo zvakatarwa kusvika gore ra2015 kuti zvinge zvave kutevedzwa nemurimi wese wechirimwa ichi,” vakadaro VaNyagumbo.
Vanoti panodarika gore iri rakatarwa ra2015, vatengi vanezenge vasisatenge masamba aya kana pasina kutevedzerwa zvinodiwa maringe nemutemo unoona nezvekutengeswa kwechirimwa ichi.
Nekuda kwemamiriro ezvinhu aya, vanoti zvichaita kuti chirimwa chevarimi vemuno chitambirwe pasi rose.
Kubva mugore ra2006, SNV yaishanda nevarimi vemasamba akasiyana kusanganisira coffee nechirimwa chemabanana.
VaNyagumbo vanoti kushanda nevarimi ava kwakabatsira mukuburitsa pachena matambudziko akatarisana navo mubasa iri.
Aka ndekutanga kuti varimi vadiki vemunyika ino vapiwe chiremera ichi icho chaipihwa varimi vakuru chete kare.
SNV isangano rinoshandira munyika dzinokwana 33, dzinosanganisira matunhu anoti Latin America, Asia, Balkans neZimbabwe.
Online Reporter