adminAbel Ndooka
Vagari vekwaZiko, kwaSeke, svondo rino vachange vachirapwa nekuvhenekwa zvirwere zvakasiyana pachena kuburikidza nechirongwa chiri kuitwa nevabvuwi vechechi yeUnited Methodist Church.
Mumazuva maviri anoti China neChishanu, varwereu kubva munzvimbo dzakapoteredza Dema, kwaZiko, vacharapwa nekuvhenekwa mahara pachikoro cheMurape Primary School.
Sachigaro weUnited Methodist Church Chitungwiza-Marondera District, VaTapiwa Mupari, vanoti pachange paine machiremba vana uye vanamukoti 20 vachibatsira varwere.
Vanoti sechechi, vakaunganidza mari inosvika US$5 000 iyo ichashandiswa gore rino pasi pechirongwa ichi.
“Chirongwa ichi tagara tichichiita gore negore uye chiri kubatsira vanhu vazhinji. Vanhu vanouya vachirapwa pachena zvirwere zvakasiyana pamwe nekutariswa kuti havana here zvirwere zvinosanganisira HIV, malaria, maziso nezvimwe,” vanodaro.
Gore rino nderechitatu chirongwa ichi chavambwa uye kusvika pari zvino chabatsira varwere vanodarika 200.
Online Reporter