admin
Abel Ndooka —
CHIKWATA chine mukurumbira wekubika madhirama nemafirimu cheNgoma Yorira Theatre chinoti chakazvipira kushanda nevatambi vakasiyana mukusimudzira matarenda avo.
Ngoma Yorira Theatre – iyo inozivikanwa nekutsikisa madhirama akaita saMy Rights, Jibilia, Baba Pinjisi goes to gym, Baba Pinjisi goes to Bulawayo neFake Friends – inoti gore rino (2017) iri kushanda zvakasimba nevatambi mukubika mafirimu nemadhirama emhando yepamusoro.
Mutungamiri wechikwata ichi, Enerst Nyatanga, anoti donzvo ravo nderekusimudzira matarenda evatambi.
Nyatanga anoti kubvira makore adarika, madhirama ari kufarirwa pamwe netambirwa zvakanyanya nevatsigiri.
“Sangano redu reNgoma Yorira Theatre riripo pakushanda zvakasimba kubika madhirama nemafirimu emhando yepamusoro uye chimwe chinhu chikuru ndechekuti tinoshanda chaizvo nesimba kudzidzisa vatambi vamunoona vakawanda.
“Kugadzira firimu kana dhirama rinonakidza panofanirwa kunge paine vatambi vacho vane tarenda uye hunyanzvi uhu hunoburitswa nezvamunenge muchidzidzisa,” anodaro Nyatanga.
Vamwe vatambi vemadhirama nemafirimu vakasimudzirwa nechikwata ichi vanosanganisira Robert Chiminya, Ethel Gwanzura, Kimberly Katapa, Lisa Chibuda, Amanda Chigoya naNyasha Gwari.
Online Reporter