admin
Muchaneta Chimuka
VATORI venhau veKwayedza nemusi weChitatu svondo rapera vakarwiswa nemumwe sabhuku achibatsirana nemhomho yevanhu vemumusha make kudunhu raMambo Seke apo vaive pabasa rekutsvaga nyaya yasabhuku uyu yekunzi ari kudanana nemudzimai wemunhu.
Munyori weKwayedza Kingstone Mapupu, mutori wemifananidzo Tertia Makurumidze (24) nemutyairi weZimpapers Charles Nyakudya vakange vaenda mubhuku raMagodhi, kwaJonas, kwaSeke, apo vakazorwiswa.
Nyaya yekurohwa kwevatori venhau ava yakapinda mudare reChitungwiza Magistrates Courts nemusi weChitatu svondo rino.
Vakamiswa mudare iri vasungwa vatatu vanoti Samson Magodhi (46) anova Sabhuku Magodhi, Rita Tanyaradzwa Ruzvidzo (35) naJairos Mugodhi (38) – vose vari kupomerwa mhosva yekurova Makurumidze.
Mutongi wenyaya iyi mudare iri ndiTracy Muzondo.
Muchuchisi Norman Koropi akaudza dare kuti nomusi wa11 Gunyana munguva dzemasikati, Makurumidze akange ari pabasa nevamwe vake achitora mifananidzo yaSabhuku Magodhi nemumwe wevasungwa.
Sabhuku Magodhi anonzi akazokonzera mhirizhonga apo akakurudzira vanhu vake kuti varove Makurumidze.
Makurumidze anonzi akarohwa kakawanda, kudzipwa pahuro nekubviswa wigi yaiva mumusoro make achinzi aifanira kudzima mifananidzo yaainge atora.
Vasungwa ava vari kutongwa nemhosva yekurova (Assault as Defined in Section 89(1) of the Criminal Law Codification and Reform Act.
Vose vari kuramba mhosva yavari kupomerwa uye vari kumiririrwa negweta ravo rekambani yeMutetwa Law Chambers.
Nyaya iyi ichaenderera mberi nomusi wa7 Gumiguru.
Sabhuku Chamunorwa Seve (74) vemunzvimbo yekwaSeke kwakare, Mapupu naNyakudya ndivo vamwe vari kupupura munyaya iyi.
Magwaro ekwachiremba ayo anoratidza hudzamhu hwekukuvara kwaMakurumidze achaburitswa mudare iri seumbowo.
Online Reporter