admin
Joel Ndlovu
ABAFUYI bezimvu sebekhuthazwe ukuba belaphe amathumba aphuma enyaweni zezimvu ngoba enza zehluleke ukuhamba ngenxa yobuhlungu okucina kubangela ukuthi zikhathazeke emoyeni.
Ekhuluma lentatheli kaMthunywa uMnumzana Elisha Moyo oyingcitshi kwezokufuya esabelweni seMatabeland North uthe amathumba la enza imvu ihlukumezeke emoyeni kakhulu njalo kucina kusiba nzima ukuthi idle.
“Imvu ingahlaselwa ngamathumba enyaweni iyacaka ngoba iyabe ingadli kuhle ngenxa yobuhlungu eyabe iphakathi kwabo.
“Imvu emithiyo ingahlaselwa ngamathumba enyaweni icina isifa kwesinye isikhathi njalo nxa kungenzeka ukuthi ize iyobeletha ilakho ukwehluleka ukumunyise amazinyane ayo okwenza umfuyi alahlekelwe yinzuzo ngoba amazinyane acina esifa ngenxa yokuswela uchago,” kulandisa uMnu Moyo.
Uqhubekele phambili esithi amathumba lawa abangelwa yingcekeza.
“Nxa imvu ilimele enyaweni ingcekeza iyangena kucine kusiba lamathumba. Lokhu kwenzakala kakhulu nxa inyawo zemvu zingahlala zimanzi.
“Kuqakathekile ukuthi umfuyi ahlalise izimvu zakhe esibayeni esomileyo njalo abone ukuthi inyawo zemvu azihlali zimanzi. Umfuyi nxa angakhama ithumba kumele efake umuthi oqondileyo obulala leyo ngcekeza,” kulandisa uMnu Moyo.
Uphethe ngokukhuthaza abafuyi ukuthi behambe ezitolo ezilemithi yokulwisa imikhuhlane ukuthi bayedinga ulwazi ngemikhuhlane engahlasela izifuyo zabo lokuthi bangayilwisa njani.
Online Reporter