admin
Ncekwenhle Ncube
ABAFUNDI abaphatheka kwezemidlalo kumfundo yaphansi kanye lephezulu kuleli akade bedibene eHwange ngeviki edluleyo baphiwe umlandu wokuthi bavikele ukumemetheka kwegcikwane leHIV leAids.
Intathelizindaba ibikelwe ukuthi abadlali bakhuthazwe ukuthi bahlanyele isihlahla esisodwa ngomnyaka ukuze kuvikelwe ukutshabalala kwemvelo kwelakithi.
Lokhu kuze kuyinkuthazo evela kuHulumende ngenhloso yokukhulisa ontanga babengabantu abazakhathalela imvelo yelizwe labo. Lokhu kungenxa yokuthi inengi lentsha aliqakathekisi imvelo.
Abafundi bakhuthazwe ukuthi bengagamuli izihlahla mahlayana nje kodwa behlanyele izihlahla ukuze imvelo ilondolozwe.
Bekulemidlalo egoqela ukugijima, ibhola lenyawo, elokuqaga kanye lele-volley.
Kunjalo nje ukuhlanyela isihlahla somnyaka kube yingxenye yomncintiswano njengoba bekulilanga lokuhlanyela isihlahla somnyaka. Lokhu kuchaza ukuthi nxa isihlahla sihlanyelwe kuhle besingezelela imiklomelo.
Umqondisi wezemfundo esabelweni seManicaland uMnumzana Edward Shumba ubuye njalo wakhumbuza abafundi laba akade bedibene kumncintiswano we-Youth Education through Sport (YES) eHwange ukuthi bonke balomlandu wokuvikela ukumemetheka kwengculazi.
“Bekuyimidlalo yamabhola etshiyeneyo kanye lokugijima ebigoqela izikolo zaphansi. Abantwana bathole ithuba lokuncintisana lamaqembu ehlukeneyo. Kodwa phezulu kwakho konke abafundi sibakhuthaze ukuthi baphathise ekuvikeleni ukumemetheka kweHIV leAids.
“Abadlali baphiwe ithuba elihle lokuthi bazi ukuqakatheka kokuphila impilo engela mkhuhlane njengabadlali bakusasa,” kulandisa uMnu Shumba.
UMnu Shumba ubuye wathi injongo yemidlalo le ngeyokuphemba indlela njengoba kulungiselelwa imidlalo yabantu abatsha.
Imidlalo yabatsha abavela ezabelweni zonke zakuleli izaqhutshwa esabelweni seMatabeleland North ngenyanga kaNcwabakazi nyakenye.
Online Reporter