admin
Cornelius Luphahla
KUZABE kungabizwa ozwayo kuNjiva Home Coming ePlumtree kanye leTsholotsho lapho okuzadibana khona abaculi bakuleli ngenhloso yokujabulisa uzulu.
Umkhosi wePlumtree weNjiva Home Coming uzakuba khona mhlaka 24 Mpalakazi eDingumuzi Stadium kusukela ngehola lesibili ngemva kwemini enkulu kuze kuyelamula ukuphuma kwelanga.
Omunye wabahleli bomkhosi lo uDJ Mapressor uthe kuzabe kulabaculi abanengi njalo ukhuthaza uzulu ukuthi azozibonela.
“Emkhosini lo kuzabe kuguga othandayo kubaculi abanengi kakhulu abagoqela uClement Magwaza, uAllen Ndoda, uNdux Junior, uMartin Sibanda, uMadlela Skhobokhobo, uZinjaziyamluma kanye labanye abaculi abatshiyeneyo.
‘‘Ngalokhu ngikhuthaza uzulu ukuthi abuye azozibonela ukudla kwamehlo njalo amatikiti okungena asekhona.
Okunye njalo umkhosi lo sizawuqhuba iminyaka yonke ngenhloso yokuthuthukisa abaculi bakuleli,’’ kutsho uDj Mapressor.
Kusenjalo eTsholotsho lakho mhlaka 26 Mpalakazi kuzathunqa uthuli lothudlana lapho okuzadibana khona abaculi emkhosini weTsholotsho Art and Culture Festival kusukela ngehola lesificamunwe munye ekuseni
UMthunywa ukhulumisane lomgcinisihlalo walo umkhosi uIsau Siwela wathi emkhosini lo bajonge ukuthuthukisa abaculi kanye lokuphakamisa idolobho leTsholotsho.
“Umkhosi lo siwusungule ngenhloso yokuphakamisa abaculi kanye lokuthuthukisa indawo yakithi ukuze kuvele emphakathini ukuthi layo ilezithelo ezinhle. Okunye njalo sikhangelele ukuthi sijabulise uzulu ngezomculo ukuze abone ukuthi siyamkhumbula noma nje inengi lethu liphila ngaphandle kwelizwe,’’ kutsho uIsau Siwela.
Umsekeli kamqondisi walo umkhosi uPaul Masuku uthe umkhosi lo bakhangelele ukuwuqhuba minyaka yonke ufane leminye imikhosi yabaculi eqhutshwa kuleli.
‘Umkhosi lo sikhangelele ukuthi siwuqhube minyaka yonke njengeminye imikhosi eqhutshwa minyaka yonke kuleli. Emkhosini lo sizakuba lamaqembu abaculi afika i-30 ngakho sikhangelele ukuthi sithuthukise ngitsho labaculi abatsha baziwe emphakathini,’’ kuphetha uPaul Masuku.
UNkosazana Coddelia Ncube onguDistrict Arts, Culture and Heritage Officer weTsholotsho uthe umkhosi lo uyathuthukisa abaculi njalo ubasiza ukuthi bathole imisebenzi.
“Umkhosi lo uqakathekile kakhulu ngoba uyathuthukisa abaculi njalo udala ukuthi abaculi abatsha babelesifiso sokuphakama kwezomculo. Okunye njalo uyangezelela umsebenzi kwabasakhulayo ngoba bazathola umsebenzi wokuzithuthukisa ngokucula,” kuphetha uNkszn Ncube.
Online Reporter