adminKingstone Mapupu
SANGANO reZimbabwe Heroes Shrines Services and Education Trust (Zihsset) rinoti riri mushishi yekuvandudza nzvimbo dzakavigwa magamba munyika muno nekunze kusanganisira kuChimoio, kuMozambique.
VaWashington Bangalila (73) – avo vanova mukuru wesangano iri – vanoti vakatanga nekuvandudza nzvimbo yakavigwa magamba kuChimoio uko vakaisa tangi rekuti vanhu vanoshanyapo vawane mvura yekushandisa.
“Ndakavamba sangano iri nedonzvo rekuvandudza nzvimbo dzakavigwa magamba idzi uyewo tinodzidzisa vana vezvikoro nhoroondo yenyika nekwatakabva nako kuburikidza nehondo yeChimurenga,” vanodaro.
Vanoti vanoshanda nebazi rezvedzidzo neveNational Museums and Monuments of Zimbabwe (NMMZ).
“Tinoshanyira nzvimbo dzakavigwa magamba muno kana kunze tichiona zvinodiwa. Takatanga nekuChimoio Heroes Shrine uko tiri kuvandudza, kune chibhorani chakacherwa neveMuseums icho changa chisina mapombi nezvimwe. Isu tichibatsirwa nekambani yeEMMB Africa inova yaVaJohn Manjengwa, takazoisa pombi yekudhonza mvura ndokuisawo tangi rinotakura marita 5 000 emvura. Uku kuremekedza vaiva varwi vehondo yeChimurenga kuburikidza nekugadzurudza nzvimbo dzavakaradzikwa,” vanodaro.
Vanoti kunyangwe vakawaniswa midziyo yemagetsi yekuti panzvimbo iyi paiswe magetsi, panodiwa midziyo inoshandisa moto wezuva kuti vakwanise kudhonza mvura kubva pasi ichienda mutangi.
Cde Bangalila vanotenda VaManjengwa avo vakavatakurira zvinhu zvakasiyana kubva muZimbabwe kuenda kuMozambique.
“Basa iri rakaitwa nemusi weMugovera wadarika (2 Mbudzi) apo takasiya mvura yave kubuda tichishandisa genereta rataiva takumbira. Tinotenda veMuseums avo vakatipa mabhegi matatu esimende nemarita 800 edhiziri. Tinotendawo Cde Joseph Nyadzayo avo vakabatsira nezvakasiyana, “ vanodaro Cde Bangalila.
Online Reporter