adminIKHEFU lephasika selize ladlula. Siyayibonga iNkosi yethu uJesu Khristu owasifela esiphambanweni. Abasaphila kasiqhubekeni sidumisa uNkulunkulu, simkhonza ngoba uyasithanda sonke. Kwasebethule, silifisela impilo enaphakade emazulwini njalo lathi sonke esilahlekelwe yizihlobo zethu kuleli ikhefu, masingalahli ithemba kodwa sikhangele kuMlimu onguye owasithumela umduduzi wethu sonke — uMoya Ongcwele.
KwezakoCALA lomzali wakhe uSigilamkhuba kasiphumuli bakwethu, simtshisa njalonje u“tsotsi” ngoba siqakathekisa ukuthula lenhlalakahle kazulu ezigabeni. Sikhangelele ukukhulumisana ngengozi lezinye impazamo ezinjalo hatshi uhlupho lwamacala adalwa ngumuntu!
Kundatshana yethu edluleyo siphathe udaba lwezezidakamizwa lobugebengu sakhuthaza labatshayeli lezihambi ukuba baqaphele ngalesisikhathi sekhefu. Lamuhla sizaxoxa ngezibonelo zababotshelwe ukudala amacala athile ngesikhathi sekhefu le-Easter besesiphetha ngokubonisana ukuba singawavikela kanjani amacala afana lalawa, kwelizayo. Sizabonisana ngezinye ezenzakale kusukela mhlaka-23 kusiya ku-28 Mbimbitho, 2016. ELusulu kubotshwe uBangile Tshuma odabuka esigabeni seZumanana eLusulu esetheswa icala lokutshaya lokwephula uMaleveni Mathuthu wasesigabeni sinye. Kubikwa uTshuma etshaye uMathuthu ngogodo kanenginengi engalweni yesokhohlo yaze yephuka.
E-nyathi kulo Songo Ncube (36) ohlala ku-286 esitaladeni ku 13th Avenue kwenye yamakopa e-Inyathi. UNcube utshaye uRegis Mazize (31) ngembodlela yotshwala endlebeni yesokhohlo ngemva kokuxabana etshwaleni. Yeyi madoda! Indaba zokulwa ematshwaleni kumbe ngemva kokunatha, ziyala ukuphela. Mhlawumbe singazijayeza ukuzithiba kungaba ngcono. Kasiqakathekiseni impilo, ubuntu, uzwelo lothando okungasiphathisa ukuba sikhuze ulaka ngoba ukulwa kuyabulalisa. Impilo kayithengwa bakwethu ngakho kasiyilondolozeni ngazo zonke izindlela.
Emavinkilini eNtabazinduna bude buduze lebhutsha lakoDulini kulobaba owaziwa ngelika Dube kuphela, odabule ukhulu uDavid Sithole (54) esiphaqeni ngesikhali esingazakalanga, kwesinye sezitanda zelokitshi leNtabazinduna u 72. Ukhulu uSithole uqhekezwe isilonda esesabekayo ebunzini.
Ngithemba lisakhumbula ngilazisa ngempi yokudingwa kwezikliwi ezazigqekeza eFolosi. Ithe isihlome yaphelela eyomanyano kazulu lamapholisa, yababamba bonke o“tsotsi” labo. Bagoqela uTadiwanashe Jengwa (33) ohlala ku 5151 eChinotimba, eVictoria Falls. UJengwa ubelomkhuba wokugqekezela abantu lamabhizimusi amancane njalo ubengatshiyi lutho kunye lesinkwa ngokwaso nxa engene esitolo! Omunye obotshelwe ukugqekeza nguHazel Ndebele (29) ohlala emzini kaMandla Ndebele eLukukwe, Nyamandlovu. Ubulele isihluthulelo sendlu kamakhelwane wakhe anduba angene atshontshe impahla zendlini lemali watshaya utshani. Yalile-ke impi kazulu lamapholisa ukunqotshwa ngu “tsotsi”, yamlonda ngonyawo yaze yayambamba. Halala mahlabezulu siyaziqhenya ngani!
Khona eFolosi, impi le ithe ilokhe ibhebha, yavutha yatshisa abagoqela uBernard Ndlovu (28) odabuka ePlumtree ehlala emzini kaRichard Ndlovu esigabeni seChangwa koNduna Shilla ongomunye wabanengi abebezama ukuchapha imingcele yeZimbabwe ngokungekho emthethweni. Omunye njalo nguDennis Nyuke oqhubeke esephula umthetho weSecond Hand Goods Act engatshumayela ngawo okwamaviki amabili ngaphambilini.
Umnumzana Nyuke ungenise izicathulo ezindala ezingu-80 kuleli ngokungekho emthethweni. Ubotshelwe ku-Road block esesibangeni se-290km emgwaqweni we Bulawayo-Victoria Falls ngoba etholakale engelachence lokuthenga lokuthengisa lezompahla.
Kwalile ukuba ikhefu leli liphele kungelamacala ezocansi. Sikhuluma kunje nje, kulo Ashim Sibanda ohlala ku 1528 eDRC edolobheni leHwange obotshelwe ukubamba unkazana ake wathandana laye amabele engafuni.
Pho-ke kasazi ukuba uthando lwakhona luyabe lungaphi nxa umuntu ebamba “isithandwa” sakhe ngamandla?
E-Nyamandlovu, uPrince Manyawo (25) odabuka esigabeni sako-Madlulane ku Village 1 eNyamandlovu ubotshelwe ukuthandana lomntwana oleminyaka engu-15 ubudala ohlala koBulawayo. Uthandane laye lumntwana waze wavunjululwa ngamanye amalunga omanyano kazulu lamapholisa okwenze acine ebotshwa esona ngesikhathi sobungcwele bensuku zePhasika!
E-Siabuwa, Binga yikho lapho okube lodubo khona ngoba umoya wokubulalana uziveze ngobubi bayo lapho abantwana ababili, oleminyaka engu 6 eyokuzalwa abulele khona oleminyaka engu 4 ubudala. Yeyi madoda, kunzima! Kubikwa omdala lo ehitshele ilembu elidazana entanyeni yomncane walibophela esihlahleni anduba amdaye sengathi usemjingweni! Lokho kwenzakale omncane lo waze waphela! Kasiqapheleni abantwabethu kungakhathalekile ukuba sebeleminyaka emingaki ubudala. Phela iyezi elimnyama lembesa santando njengecala elembula ingubo lingene. Esenelisa ukukwenqabela, kasikuvikeleni. Kunengi-ke okwenzakale kuleli khefu kodwa sithe sibonisane ngehetshezana lakho nje.
Okwalamuhla sizamela lapha, thumelani imibono yenu kunombolo yeWhatsApp u – 0783185092 kumbe ebulenjini ku – [email protected] / [email protected] / [email protected]
Online Reporter