admin
YiNtatheli kaMthunywa
ABANTWANA abalomkhuhlane wenhliziyo sebezathola usizo kubodokotela esibhedlela seMpilo kulandela ukuvulwa kwe-Cardiac Unit kulesi isibhedlela.
Ukuvulwa kwalesi isibhedlela somkhuhlane wenhliziyo kuze ngesikhathi ilizwe leZimbabwe linanza iWorld Heart Day. Ilanga leli ligujwa umhlaba wonke jikelele minyaka yonke mhlaka 29 Mpandula ngenhloso yokwandisa ulwazi emphakathini ngezifo zenhliziyo langendlela zokuzivikela.
Lamuhla ekuseni, i-Cardiac Unit le izavulwa ngokusemthethweni nguMsekeli kaMphathintambo wogatsha lwezempilakahle lokondliwa kuhle kwabantwana uDokotela John Mangwiro.
Lokhu kulandela umkhankaso okhokhelwe yinhlanganiso yeBrave Little Hearts Zimbabwe ibambene loHulumende lezinye inhlanganiso ezitshisekela ukusiza abantwana abaphila lomkhuhlane wenhliziyo.
Isibhedlela seMpilo kubikwa sizaqala ukunikeza usizo kusukela lamuhla, okukhangelelwe ukuthi kuphathise kakhulukazi inengi labantwana abahlutshwa ngumkhuhlane wenhliziyo abahlala kuzabelo zakoBulawayo, eMatabeleland South laseMatabeleland North.
Eminyakeni edluleyo, usizo lokwelatshwa umkhuhlane wenhliziyo belutholakala ezibhedlela zeHarare kuphela. Kwandise njalo ukuthi izigulane zicine zidinga usizo kwamanye amazwe abalisa South Africa le-India ngenxa yokuswela ukuphathiswa ngabodokotela abalolwazi olujulileyo kuleli.
Andubana kuvulwe i-Cardic Unit le, uMthunywa uxoxe loNkosazana Tendai Moyo uMqondisi weBrave Little Hearts Zimbabwe.
UNkszn Moyo uthe babopha iqhinga lokuvula isibhedlela lesi bebambene labazali babantwana abagula izifo ezithile zenhliziyo.
“Njengenhlanganiso yeBrave Little Hearts sibambene logatsha lwezempilakahle lokondliwa kuhle kwabantwana ukuthi sikhulume, sifundise umphakathi ngenhlupho esihlangana lazo mayelana lokugcina abantwana abagula imikhuhlane yenhliziyo, ngaleli ilanga leWorld Heart Day,” kutsho uNkszn Moyo.
“I-Cardiar Unit le eseMpilo Hospital izakuba ngeyokuqala kulumhlubulo ongezansi yelizwe okuzaphathisa kakhulu ekuthini abantwana bathole usizo eduzane. Sikhankasela amalungelo wokuthi abantwana abagula isifo senhliziyo bathole usizo esibhedlela esiseduzane labo, ngendlela engasoke ibize imali enengi. “Sikhankasela njalo amalungelo wokuthi bathole odokotela abazingcitshi zokwelapha imikhuhlane thile ehlasela inhliziyo.”
Uthe ulusizi ukubika ukuthi inengi labantwana eligula umkhuhlane wenhliziyo liyafa lingakafikisi iminyaka emihlanu yokuzalwa.
“Nxa umntwana ogula umkhuhlane wenhliziyo engatholanga usizo olwaneleyo ngokuphangisa, amathuba akhe okuphila impilo ende ayancipha. Yikho okusifuqe ukuthi sikubone ukuba iMpilo Hospital iyaphakanyiswa ukuthi ibe le-Cardiac Unit ezaphathisa abantwabethu, ilethe inguquko enkulu elizweni.
*uMthunywa uzalandela udaba lokuvulwa kwe-Cardiac Unit esibhedlela seMpilo
Landela loludaba lezinye mayelana lomkhuhlane wenhliziyo leWorld Heart Day emakhasini ethu wobulembu.
Online Reporter