Online Reporter
Muchaneta Chimuka
ZIMBABWE yakabatana nenyika dzepasi rose mukupemberera zuva guru rekudzivirira kusvibiswa kwemhepo yemuchadenga reWorld Ozone Day rinova rinocherechedzwa nomusi wa16 Gunyana gore negore.
Vachitaura pachiitiko ichi muHarare, gurukota rinoona nezvenharaunda, mamiriro ekunze nekuchengetedzwa kwemhuka, Dr Evelyn Ndlovu, vanoti zuva iri – iro rinombodaidzwa kunzi International Day of the Preservation of the Ozone Layer – rakakosha muraramo yevanhu, mhuka nezviwanikwa zviri pasi rose.
“Zuva iri rakabva pamusangano weMontreal Protocol on Substances that Deplete the Ozone Layer, apo pakaitwa chibvumirano ichi nomusi wa16 Gunyana mugore ra1987 kuMontreal, Canada. Chibvumirano cheMontreal Protocol chinoramba chiri chimwe chezvinhu zvakakosha muzvitenderano kana takatarisa nyaya dzekuchengetedzwa kwenharaunda pasi rese nekurwiswa kusvibiswa kwemhepo yemuchadenga,” vanodaro.
Vanoti kune mishonga nehumwe hutsi hunokanganisa mamiriro ekunze emuchadenga zvichibva mumidziyo yakadai semafiriji, maAir Conditioner nemimwe michina iri mumaindasitiri (hydrofluorocarbons).
Dr Ndlovu vanoti mushure mekuona budiriro yekurwiswa kwedambudziko rekusvibiswa kwemhepo yemuchadenga, sangano reUnited Nations General Assembly rakabuda nechisungo cheResolution 49/114 of 22.
Izvi zvakaona UN ichitara musi wa16 Gunyana kuti rive zuva guru rekucherechedza budiriro iyi uye zvibingaidzo zviri kuita kuti nyika dzirambe dzichisangana nekusanduka kwemamiriro ekunze.
“Hurumende yeZimbabwe yakapinda muzvibvumirano izvi uye iri kuramba ichifambirana nezvitsidzo zvayakaita zveMontreal Protocol zvinoita kuti ibatane nenyika dzepasi rose mukucherechedza zuva iri rakakosha kudai. Gumbeze rinochengetedza makore (ozone Layer) rakakosha zvikuru mukutidzivirira kubva kumirazvu yezuva nokudaro rikaramba richipera nekuda kwekusvibiswa kuri kuitwa mhepo nezvinhu zvakasiyana zvinoitika munharaunda zvinoreva kuti utano hwevanhu hunoenda parumananzombe, kusanganisirawo zvipfuyo nezviwanikwa zvese,” vanodaro.
Dr Ndlovu vanoti kuwanda kwemirazvu yezuva kunokonzera kunyuka kwezvirwere zvegomarara, tsanga dzemumaziso, kudzikira kwemasoja emumuviri anorwisa zvirwere nekusabudirira kwemabasa ekurima, pakati pezvimwe.
