adminYiNtatheli kaMthunywa
SEZIVUTHIWE inkundla zenkezo yomdlalo wenguqu oweJohn Landa Nkomo Liquor Hub Super 8 kulandela isimemezelo samaqembu azadibana kumpelaviki elandelayo kulumqhudelwano oqoqwe nge$5 000.
Inkezo le izadlalelwa ngamathimu ayisitshiya galombili akade ephezulu kuhlandla lakuqala lesizini kaDivision One kumhlubulo ongezansi yelizwe. Amaqembu la abalisa iTechnosphere, Bantu Rovers, ZRP Bulawayo, Amagagasi, ZPC Hwange, Bulawayo Chiefs, Black Boots leVictoria Tigers.
Ngempelaviki edluleyo inhlanganiso yeZimbabwe Football Association ihlangene labameli bamaqembu labahlawulela inkezo le benze umbuthano wokwehlukanisa amathimu azancintisana.
IBulawayo Chiefs izadlala leBantu Rovers kumdlalo wokuqala. Amapholisa eZRP Bulawayo akhangelelwe ukudibana leBlack Boots kumdlalo ozaqhutshwa enkambeni yeNtabazinduna.
Kube yisimanga ukuthi amathimu aseMatabeleland North afakwe kungcebethu inye nanko phela iAmagagasi izamelana labomakhelwane bayo iVictoria Tigers, ZPC Hwange ibisidlala leTechnosphere.
Inkampani yeLiquor Hub, eyiyo esekela linkezo, ibike ukuba umvuzo wethimu ezanqoba ngowe$1 500. Iqembu elizadliwa kuma-final lizathola i$800.
“Wonke amaqembu azaphatheka anqotshwe kumidlalo yakuqala azathola i$200. Kuhlandla lama-semi-final, amaqembu azaphuma kumncintiswano azaphiwa i$400 linye ngalinye,” kutsho uSam Dzimbu obemele iLiquor Hub.
Inkezo le iza ngesikhathi sekudlule iminyaka iligi le idlalelwa kungelamali, okuyikho osekufake idlabuzane kumaqembu ukuthi adlale ngokuzimisela.
Umqhudelwano weJohn Landa Nkomo Liqour Hub Super 8 uzaqhutshwa minyaka yonke njalo usukhweze isisindo senguqu yalumhlubulo.
Umgcinisihlalo weZifa kulumhlubulo welizwe uMusa Mandaza ubikele iphephandaba likazulu ukuthi ezemidlalo ziyaphucuka kulindawo, yikho nje sekusungulwe inkezo entsha.
“Sikhangelele ukuthi inkezo yeJohn Landa Nkomo Liqour Hub Super 8 iphakamise indlela amaqembu ethu adlala ngayo.
“Siyabonga kubaqoqi labasekeli balinkezo ngokwethemba langokukhetha ukuthi bancedise ithalenta yenguqu kuZifa ekumhlubulo ongezansi yelizwe,” kubika uMandaza.
Kuzwakale njalo ukuba iZifa iyasuthiseka ngokukhula kwenguqu esabelweni lesi ngoba isinanzelele ukuthi manengi amathimu kulindawo.
Uluhlu lwamathimu enkezo yeJohn Landa Nkomo Liquor Hub Super 8:
Black Boots v ZRP Bulawayo, Bulawayo Chiefs v Bantu Rovers, Amagagasi v Victoria Falls Tigers, Technosphere v ZPC Hwange.
Online Reporter