Online Reporter
Fungai Muderere
ABASEKELI uqobo beqembu leHighlanders sebebikelwe ngumaqhuzu weBosso uDenzil Mnkandla ukuthi bangakhathazeki ngesimo seqembu ngoba lonyaka kuzaqoqwa iqembu elilabadlali abaqinileyo.
Kunsuku ezisanda kwedlula besekulensolo ngendlela iqembu elibuthanisa ngayo abadlali, kodwa sekubekwe kwacaca ukuthi konke kuqhutshwa ngendlela efaneleyo, ezakwenza wonke umuntu olilunga leBosso kunye labalandeli basuthiseke ngesikhathi kusiyaqala isizini yeCastle Lager ngoMbimbitho.
UMnkandla, ngokunjalo uthe insolo lezo zifakwe khatshana ngoba kuza iqembu eliqine saka, elihlolwe ngodokotela, kwasuthisekelwa wonke umuntu.
Uthe abadlali bahlolwe imizimba yabo, kudingisiswa ukuqina kwabo okugoqela isimo segazi, inhliziyo, umthambiso, amathambo lokunye.
“Umbiko wabezempilakahle uthi bonke abadlali baqinile.”
“Abadlali bahlolwe kakuhle zingcitshi zethu, okutsho ukuba balungele ukuqala amalungiselelo esizini entsha.”
Kumalungiselelo ayo, iHighlanders ikhiphe abanye abadlali, yabisa abatsha. Kwabatsha laba kulonozinti uPride Zendera, Mongameli Tshuma, Tawanda Shenje ovela eHwange, Royn Nyamono loRayton Chumance.
Abafulathele iqembu nguMason Mushore, Mckinnon Mushore, Melikhaya Mthabisi Ncube, Honest Mhlanga, Nqobile Ndlovu, Martin Nhubu, Atusaye Nyondo loLearnmore Muyambo.
Iqembu lakulisizini lizaqeqetshwa nguThabo Senong oweSouth Africa, encediswa nguMkhokheli Dube, owake waba ngumdlali kuleliqembu.
Iqembu, kusukela kumaviki amabili adluleyo, libike ukuba lizakwethula amabizo alabo abangena kubhentshi labaqeqetshi lakwezinye ingatsha.
USenong (45) kubikwa uphiwe umlandu wokuthi akhuze ithimu iqede isizini ka2026 ikunombolo yesithupha kusiyaphezulu. Umqeqetshi lo wasayina isivumelwano seminyaka emibili.
