YiBosso leScottland eMaphisa

Innocent Kurira

IQEMBU leHighlanders lizadibana leScottland kumkhosi wokunanza iminyaka engamatshumi amane lasithupha kaZibuse kuleli, ozaqhutshwa eMaphisa, esigabeni seMatobo, eMatabeleland South.

Lokhu kuvezwe kumbiko weKhabinethi owethulwe nguMphathintambo wogatsha lwe-Information, Publicity and Broadcasting Services uDokotela Jenfan Muswere ngoLwesibili.

Umdlalo lo, ozabe umhlaka 18 Mabasa, ukhangelelwe ukuba ngomunye wemidlalo ezathokozisa uzulu ngalelilanga eliqakatheke kakhulu kumphakathi wakuleli lakuHulumende.

Amaqembu womabili azadibana ngesikhathi iligi ephakemeyo eyeCastle Lager Premiership ilamaviki ambalwa ivule isizini.

Indikimba kaZibuse lonyaka ithi; “Zim@46: Ukubambana Lokuthuthuka Sibheke Umbono ka-2030, (Zim@46: Unity and Development Towards Vision 2030).

Umdlalo lo uzaphinda unikeze iHighlanders ithuba lokuthi itshengise indlela eziqoqe ngayo lonyaka kunye lokuxhumana lenengi labalandeli bayo eMatabeleland South.

Umdlalo kanobhutshuzwayo kujwayelekile ukuthi ube yingxenye yemcimbi kaZibuse.

Kumdlalo wenguqu yabesifazane kuzadlala iMpopoma Sports Academy leHerentals Queens.