marble nkomo
YINtatheli kaMthunywa
KULOMPHUROFETHI kunye labalandeli bakhe abaphakathi kwetshe lembokodo kulandela ukuthatha inhlabathi engcwabeni lenye indoda bayihlanganise lesawudo bayikhanzinge bethi yiyo indlela yokwelapha umnawakhe kamufi, uMusaita Gatakata.
Isenzo lesi sivuse ulaka lwabantwana bakamufi, abaveze lokhu edale lenduna befuna izimpendulo ngesenzo “sobuthakathi” esenziwa engcwabeni likayise.
Omunye wamadodakazi kamufi, uNaume Gatakata, ubike ukuthi ukufa kukayise ngomnyaka ka-2021 kulokhu kubuhlungu kibo njengemuli njalo belezinsolo.
“Ubaba wagula ngemva kokunatha amahewu emsebenzini. Wakhala ngobuhlungu esiswini, waze walaliswa esibhedlela, lapho abhubhela khona. Inhlolisiso yesidumbu yaveza ukuthi wayefakelwe itshefu ekudleni, kodwa njengemuli kasizange sizwisise ukuthi kwenzakalani ngempela.”
Ngemva kweminyaka umuyi wangcwatshwa, umdeni waqalisa ukubona izinto ezingaqondakaliyo ethuneni lakhe — amanalithi, amambodlela, kanye lendiwo — okwakungazange kubekwe yizihlobo eziseduze.
“Sakhathazeka. Ngokuhamba kwesikhathi, ubabomncane waqalisa ukuba lobuhlungu obungapheliyo enyaweni, wasesithi kubangelwa ngumoya kababa. Wahamba komunye umphurofethi owathi kuthathwe inhlabathi ethuneni,” kutsho uNaume.
Sethuswe yikutholakala kwezinto lezi, uGatakata uthe umdeni wadinga ukuzwisisa kubosiyazi ukuthi izinto lezi zitshoni.
“Saqalisa ukubona izinto ezingaqondakaliyo ethuneni likababa. Ngemva kokumngcwaba, sabona amanalithi eyefakwe phezulu kwengcwaba.
“Ngokuhamba kwesikhathi, sabona amambodlela efakwe eduze lengcwaba. Saphinda sathola lendiwo.
Izinto lezi zazingabekwanga yizihlobo eziseduze, ngakho sakhathazeka,” watsho njalo, lokuthi isimo saqhubeka sisiba sibi ngesikhathi uyise omncane esebulawa lunyawo.
“Ubabomncane wathi unyawo lubuhlungu, wasesithi lubangelwa ngumoya kababa owatshonayo,” kutsho uGatakata, eqhubeka esithi ubabomncane wahamba wayadinga usizo komunye umphurofethi, onguye owalaya ukuthi bathathe inhlabathi engcwabeni.
Abemuli bathukuthela kakhulu kunyanga edluleyo bebona ingcwaba lilemithanithani.
“Badinga usizo kumphurofethi owathi bathathe inhlabathi engcwabeni likababa. Inhlabathi yakhona yakhanzingwa yahlanganiswa lesawudo yabuye yabuyiselwa engcwabeni.
“Ngenyanga edluleyo, saya ethuneni sathola ukuthi kulegodi eligejiweyo elitsheni likababa. Yikho lapho esananzelela khona ukuthi kukhona okutshaya amanzi.
Lokhu kwaphikiswa nguMusaita Gatakata, ubabomncane onguye osolwa ngokwenza imikhuba le. Lanxa wavuma ukuthi wayedinge usizo komunye umphurofethi ngenxa yokugula, walandula ukuthi nguye owathatha inhlabathi engcwabeni.
“Umphurofethi wangitshela ukuthi kudingeka ukuba ngithathe inhlabathi engcwabeni ukuze ngisile. Abantu bahamba bayathathela umphurofethi inhlabathi, kodwa mina kangizange ngiye engcwabeni ngoba ngangingahambi. Ngangisebuhlungwini njalo ngangidinga uncedo. Ngangingajonganga ukungahloniphi ingcwaba lomnewethu,” kutsho uMusaita, ethi wayejonge nje ukuthi asile.
Uveze ukukhathazeka ngensolo zokuthi ulesandla ekufeni komnewabo.
“Iqiniso yikuthi umphrofethi abakhuluma ngaye, uMacheka — ngumngane wami omkhulu. Khathesi bathi mina loMacheka sabulala umnewethu, okungasilo qiniso,” kutsho yena.
Induna uMutasa idingisise ngesizatho sokuthatha inhlabathi engcwabeni ibuye ikhanzingwe.
Uchothoze isenzo lesi waxwayisa ukuthi inkundla yomdabu ithathela phezulu ukungcoliswa kwamangcwaba.
Ugcizelele ukuthi amangcwaba yindawo ezilayo okumele ihlonitshwe kungakhathalekile ukuthi kulezingxabano kumbe kulendaba zomoya.
Induna ithe ifuna ukuzwa ubufakazi bomphurofethi.
“Ngizalihlawulisa ngokugcolisa ingcwaba. Lokho kubi kakhulu. Kwenzelwani ukuthi likhanzinge inhlabathi liyihlanganise lesawudo? Ngeke uye engcwabeni uyekwenza imithanithani nje? Ngifuna umphurofethi othe kwenziwe lokho azovela phambi kwenkundla. Kumele sizwe ukuthi wayethe kwenziwe njani lokuthi kwenzelwani,” kutsho induna, andubana athi amanye amalunga emuli azokupha ubufakazi.
Online Reporter